我想喺夜場搵真愛，你陪唔陪我癲？: 三十八.

我哋嚟到啱啱橋底個小巴站，但係個小巴牌上面冇嗰架通宵小巴嘅號碼。

「冇喎。」我嘆咗啖氣。

「咁我哋仲有咩搭？」佢問我。

「我知大埔墟有另一個站。」

「咁你帶路啦。」





其實通宵小巴好多時都唔會寫喺個小巴牌上面，而我哋要搭呢一架都唔例外，我只不過想同佢行多陣啫。

喺無人嘅街上面，只有我同佢。

我放慢腳步，而佢就喺我後面跟住。

明明都已經一齊咗，但唔知點解我都係好怕怕羞羞，好似A0仔啱啱出Pool咁。

我越行越慢，步速同八字頭啊伯差唔多，就係為咗延長同佢行呢一段路嘅時間。





十五分鐘嘅路程，就咁硬生生比我拖咗成半個鐘。

行路階段完結，進入等車階段。

我哋兩個人都未企定，一架小巴就停咗喺我哋面前。

「呢架啱唔啱？」佢問我。

我冇答佢，諗住詐傻扮懵扮唔知然後等下架，點知佢一嘢就衝咗上去拍車門。





車門打開，佢即刻開聲問司機：「係咪返九龍灣架？」

「係呀！」

司機答完佢，佢就轉身𣚕我上車。

事到如今，我都冇可能叫佢行返嚟等下架，唯有死死地氣咁過去上車。