我想喺夜場搵真愛，你陪唔陪我癲？: 三十七.

佢哋繼續吹水，而Clover就繼續笑，完全無視咗我嘅存在。

「講少句啦，我咩形象都無曬喇。」我喺到作出無謂嘅掙扎。

「喂喂喂，大家靜咗先！」啊希爆曬咪咁講。

「係，想點？」我問佢。

「今次唔做鳩你，今次我要問鳩你。」





「咁你問啦。」我有少少無奈。

「佢笑得咁開心，你兩個又夜媽媽坐海旁。」佢用力吸咗啖氣：「到底一齊咗未先？」

我唔知點答，亦都唔夠膽答。

我望住佢，等緊佢比出一個答案。

佢望住我，沉默咗幾秒，然後就瞓咗落我大脾到。





佢搶走我部電話：「一齊咗喇，一齊咗喇。」

佢一講完，成個Discord就充斥住歡呼聲同埋「幾時請食出Pool飯？」呢句嘢。

「走先喇，下次再講。」我覺得有少少尷，就快快手撳走咗。

「我哋返去？」我問佢。

「差唔多喇。」





「返淺水灣？」

我會咁問，係因為我聽過佢講話有時會去親戚屋企住。

「唔係呀，返調景嶺。」

「等我一陣。」我開電話睇咗睇：「行啦，我知邊到有通宵小巴可以返九龍灣比你轉車。」

「好。」

我起身之後就拉埋佢起身，然後拖住佢隻手行去小巴站。

沿路我冇咩幾句，因為我仲未消化到。

我以為仲要一段時間先會發展到呢個位，點知一入Discord就比人助攻到一齊埋。





開心係開心，但我完全招架唔住。