我想喺夜場搵真愛，你陪唔陪我癲？: 三十六.

我坐喺石壆上面望住個海，而佢就坐喺我隔離。

我哋兩個都冇講嘢，我靜靜咁飲酒，而佢就靜靜咁望住個海。

呢一刻嘅我哋，靜到可以聽到對面岸啲大媽鳩叫。

好尷，唔知講咩好。

「叮！」





我部電話響咗聲，打破咗呢個寧靜嘅環境。

「邊個咁夜搵你？」佢問我。

我喺後袋拎咗部電話出嚟，係我個Friend喺Discord Group@曬所有人。

「入去？」我問佢。

「可以啊。」





我入Discord，然後開擴音。

Group裡面有我四個Friend，一個係啊嫂，一個係我女仔Friend，叫啊希，另外兩個就係我去咗台灣讀書嘅好兄弟，一個叫啊生，一個叫啊言。

「喂，搞咩啊。」我問佢哋。

「你唔喺屋企。」啊生淫笑咗聲：「喺邊啊？講嚟聽下。」

「唔喺屋企啊，喺海旁。」





「一個人？」

「係呀。」

「唔似你喎，平時你成張床都係女。」

Clover聽到呢到，忍唔住笑咗。

「把聲邊個嚟？」啊嫂問我。

我望住Clover：「嗯…我個女仔Friend。」

「你有女仔Friend架咩？」

「我淨係聽過你有女朋友咋喎。」啊希再補一刀。





我都已經唔知點覆佢哋，只可以好尷尬咁喺到笑。