我想喺夜場搵真愛，你陪唔陪我癲？: 三十五.

天橋裡面嘅光管灑落柔和嘅白光，天橋外面嘅街燈散發住零落嘅淡橙色燈光。

「呼…」

天橋下面有零星嘅車駛過，引擎聲由細聲變大聲，最後消失喺寂靜嘅黑夜之中，就好似每一個平凡人嘅平凡一生裡面平凡嘅過客一樣。

由陌生到熟悉，最後又離座。

天橋裡面只有我同佢，我哋對望一眼，然後慢慢走向對方。





平日覺得哽耳嘅車聲，呢一刻成為咗我哋呢一幕最簡單但又最適合嘅背景音樂。

我哋嚟到對方面前，佢等緊我講嘢，但我怕醜到半句嘢都講唔出。

兩個人你眼望我眼，半粒聲都冇，情況有啲尷尬。

不如…我開聲先？

「你想去邊？」





「你想去邊？」

我哋喺同一時間，問咗同一個問題。

我哋完全忍唔到笑，喺天橋裡面大聲咁笑咗出嚟。

佢吸咗啖氣，平伏返心情：「我冇嚟過大埔，你帶路啦。」

「買少少酒去海旁？」我問佢。





「好啊。」

「咁行啦。」

講完我就轉身開始行返落去，而佢就喺我後面跟住。

買完酒嘅我帶住佢喺只有街燈微弱橙光照亮嘅街道穿梭，好快就嚟到海旁。