我想喺夜場搵真愛，你陪唔陪我癲？: 三十四.

啱啱換完衫，電話就即刻響。

「邊個站落？」佢問我。

「廣福。」我答佢。

「咁好快到架喎。」

「係啊。」





我知啊，所以我即刻衝出去換鞋。

我着好鞋出去𨋢大堂，然後部𨋢上嚟嘅時候層層都停。

大佬啊，唔係趕時間先嚟搞啲咁嘅嘢呀嘛？

我有一刻衝動想跑樓梯落去，但係諗起我從來冇合格過嘅體育科，我覺得…

搭𨋢點都快過我跑。





一出𨋢，我就收到佢Whatsapp。

「我就到啦。」

仆你個街，我離個巴士站仲好遠，司機揸慢少少得唔得？

我向住巴士站開疾步，為求快過佢到巴士站。

喺我準備跑上天橋嘅時候，電話再次響起，我喺樓梯坐低，然後拎出嚟睇。





「我到咗喇，你喺邊？」

佢就喺我對面個巴士站，喺我諗住覆佢嘅時候，佢打咗比我。

我瞬間抖順條氣，然後聽咗。

「你喺邊呀？」佢問我。

我企起身揮手：「你望下對面。」

「你…好似戇鳩仔。」

我可以見到喺我對面嘅佢笑到彎曬腿腰，證明我呢個行為真係好鳩。

「你唔好笑住先啦。」





講完我就Cut咗線，然後轉身跑上天橋，佢都搭電梯上嚟。