我想喺夜場搵真愛，你陪唔陪我癲？: 十四.

我拉開鐵閘行咗出去：「我走啦。」

「早啲返呀！」我老母坐喺梳化上面向我呢邊嗌。

「你知我唔會架。」我有啲無奈。

「咁做老母嘅講返句例牌台詞姐。」

「知啦，唔好咁多戲劇效果啦。」





「你知你老母我夢想係做演員架。」

我冇再覆佢，因為我知咁落去會沒完沒了，轉身就衝出𨋢大堂。

「我去搵咗佢先？」我喺Whatsapp問啊晴。

「可以啊。」佢覆我，但冇講Clover喺邊。

然後，我就去咗沙田圍，因為佢今日要返學，而根據佢間學校嘅地理位置，我估佢會嚟呢邊搭車。





唔好問我點解知佢邊間學校，佢瞓嗰陣跌咗張學生證出嚟。

我七點到，之後就Send咗個Whatsapp比佢。

「佢幾點到？我到咗啦。」

「佢話佢同佢個Friend去食個飯之後Check in擺低嘢先。」

「好。」





Wait a minute，呢件事唔太對路。

「Check in」？咩事？

我有少少心急咁打字：「佢同邊個住？」

然後，我又Del返句嘢。

第一，人哋同邊個住酒店關你咩事，人哋又唔係你邊個。

第二，你個死人雙魚座唔好FF咁多啦，現實邊有咁多狗血劇情。

我喺石壆坐低，望住啲男男女女一對對咁行過，然後一陣陣風吹埋我到，加埋眼前見到嘅嘢，真係凍到懷疑係去咗北極。

一個鐘過去，冇消息。





兩個鐘過去，都係冇消息。

唔係比人放飛機呀嘛？