我想喺夜場搵真愛，你陪唔陪我癲？: 十二.

「不如收隊啦。」我喺Group裡面講。

「唔可以收隊。」啊晴覆我。

「why？」

「總之就唔撚得。」

「Okay。」我比佢D氣勢壓過咗：「咁今晚見。」





雖然係咁講，但係我根本就未有錢，我只不過係喺到博運到。

見差唔多時間，我就收埋電話，快快手搞掂要做嘅嘢之後就急急腳衝返屋企瞓。

一返到去，我就即刻坐低喺梳化問FD借錢，然後問問下就…

瞓着咗。

對唔住囉，咁真係好撚攰呀嘛。





再醒嘅時候，時間已經嚟到九點。

我打開電話睇，冇人覆。

果然，都市傳說話一講借錢就冇人覆係真架。

我收埋電話，之後就好似賭輸身家咁係咁喺到搲頭，懷疑目標係想搲穿佢自殺。

「咔！」





有人開門，我轉身望過去，返嚟嘅喺我老母。

我諗咗諗要唔要問佢借，不過我個腦話比我聽佢一蚊都唔會比我。

我嘆咗啖氣，然後又轉返去繼續搲頭。

「做咩呀啊仔？」佢擺低袋喺飯枱上面。

「冇。」

「講啦屌你。」

「我今晚唔喺屋企食。」

「可以啊，三百蚊比你出去同人打下邊爐都得。」





唉，死就死啦。

「三百邊夠。」我問佢：「三千點睇？」

「你要三千咁多做乜鳩啊？」

我即刻開始諗有冇咩婉轉啲嘅講法，然後我發現…

冇。

佢見我咁耐冇應佢，開始有少少唔耐煩：「快啲講啦，我仲要煮飯。」

「我想…落蘭。」我比佢兇一兇就咁講漏口。





碌柒，我已經準備好比佢屌一餐。