我想喺夜場搵真愛，你陪唔陪我癲？: 七.

佢哋一掃一嘟就頭都冇回咁入咗去，而我就嘟極都嘟唔撚到，差啲就想一手將佢部垃圾機掟出街。

我啱啱坐低，佢哋已經睇好曬要食咩，而我啱啱先拎起張餐牌。

跟住落嚟發生咩事，我已經唔想知、唔想理、唔想記得。

「埋單。」A仔舉高手揈咗揈。

講完，收銀條友就行過嚟擺低咗張單。





我望咗望，$120。

我見A仔拎咗張50蚊出嚟，我就準備拎200蚊出嚟諗住拎佢50蚊當找錢。

喺我拎錢出嚟嘅同時，佢收埋咗佢張50蚊。

咩料，你做乜鳩要收埋啲錢呢？

下一秒，我明曬。





「多謝大佬！」

喂，我無諗住請曬兩個架，我淨係想請Clover咋大佬。

我隻手拎住啲錢停喺半空，諗緊要唔要同佢講。

之後我默默嘆咗啖氣：「我去埋單。」

跟住落嚟喺另一個重要嘅環節，就係要送Clover返屋企。





「你返邊？」我問A仔。

「我返沙頭角啊。」佢再問：「Clover你返邊？」

「我返淺水灣。」

唔順路啊，走啦，你攰喇。

「我送你啦，我今日下晝有嘢做，要hea到三點。」

「送埋你返去先囉，我今日應該冇嘢做。」A仔睇咗睇電話：「我今日冇嘢做，行啦。」

「唔洗兩個送啦，我同呀熙行啦。」Clover行咗嚟我隔離。

聽到未呀？乖啦，返屋企啦。