殘酷暗戀物語【最終部曲】: 愛比死更冷（中集）
當佢全心全意去關心我嘅時候，我選擇咗將佢推開，而當我回心轉意想再捉緊佢嘅時候，已經發現佢悄悄咁離我而去，呢個可能就係我同佢最遙遠嘅距離。
大門鎖上嘅剎那間，我發呆咁望住餐枱上兩碟忌廉蘑菇意粉，早就已經攤凍咗。我趴喺餐枱上面，腦海霎時之間空白一片。感覺上，我又再一次俾最親近嘅人拋低。
但係我唔想今次就咁完得不明不白，我仲未同佢分享——喺呢趟旅行入面，曾經有個日本女仔鼓勵我去重新認識，究竟我心裡面最重要嘅事物係咩嘢。
我想俾佢知道，當日我坐喺巴黎情人橋上面，幻想住佢亦都坐喺我旁邊攬住我腰，我挨住佢肩頭，共同見證住情侶互相許下諾言，然後再到我哋將一對嘅愛情鎖，緊緊咁扣喺欄杆上面，最後相擁互吻...
我想俾佢知道，我心裡面最重要嘅人...
就係佢。
我返入睡房，拎返起個斜揹手提包，確認多次本畫簿依然仲喺裡面，然後重新掛返喺膊頭上面，推開屋企大門之後直接朝住後樓梯方向衝過去。
我今次一定唔會再逃避落去。
穿過樓梯，我去到佢屋企門前停低，用手梳返好啲頭髮，整理好自己儀容，雙手拍拍自己臉頰。
「王樂兒，加油！」我幫自己打打氣，再深呼吸一下。
再按下門鐘———
「鈴...鈴...鈴...」
感覺上，佢屋企門鐘鈴聲好似唔同咗？
門鈴聲靜止過後嘅沉寂，令我心跳加速更加緊張，但係我又唔敢好似以前咁㩒鐘㩒到佢應門為止。
半响過後，終於聽到有腳步聲漸近，門打開了，我壓抑住傷感，努力擠出一個笑容。
只係眼前呢個男人我從來未見過，佢唔係郭家朗，亦都唔係佢爸爸。
「小妹妹，你搵邊個啊？」完全係陌生人一個，但可能係佢親戚？
「我想問郭家朗喺唔喺度？」我鼓起勇氣咁問，雖然我唔敢直視佢對雙眼。
「佢哋三個禮拜前已經搬走咗喇，間屋賣咗俾我哋啦喎。」
「你話...佢哋三個禮拜前已經搬走咗...?」
「係啊，佢哋移民所以賣咗呢層樓，而且郭生郭太好似已經飛咗㗎喇，你不如打俾你朋友仔問吓喇。」
「唔該你...」我帶著失望嘅表情，向面前個男人點頭道謝。
當男人關上門後，佢最後嗰句說話一直徘徊喺我腦海入面，佢頭先話郭家朗爸爸媽媽已經離開咗香港，而佢哋又已經賣咗間屋，咁呢三個星期郭家朗住喺邊度？唔通佢呢三個星期只係孤零零一個人過？
突然間我腦裡閃過一個念頭，會唔會係原本佢哋一家人一早就應該要喺三個禮拜前飛，只係郭家朗想等埋我喺歐洲返嚟見我最後一面，所以先自己獨留香港？
黐線...王樂兒你而家憑咩咁自以為是，覺得人哋會肯花時間去等你啫。
我行返出電梯大堂，望住電梯顯示嘅所在樓層，兩部𨋢同時喺G樓，點解偏偏要喺最趕時間嗰陣先嚟冇𨋢。
「王樂兒，冷靜啲...冷靜啲...」
我調整住自己急促嘅呼吸，重新思考最有機會可以搵到佢嘅地方。
親戚屋企？但我完全唔識佢啲親戚吖，點算好...
酒店？我記得細細個搬屋嗰陣，聽過我爸同我媽商量，要唔要搵間平平地嘅酒店租返兩個星期暫住，我嗰陣仲滿心期待咁走去同佢哋講，我想住新開嗰間迪士尼酒店，佢哋捏住我面珠墩，話邊有咁多錢住咁多晚啊傻女。
定係去咗陳柏希屋企呢，但呢刻我仲有咩面去打俾佢問郭家朗嘅下落。
最後，我決定一邊打電話俾郭家朗，一邊跑去附近幾間酒店打探。
「小姐，為咗保障租客嘅私隱，我哋唔可以咁樣幫你查㗎。」
「求吓你吖...可唔可以幫我一次，幫我一次咁多吖。」酒店前檯姐姐佢好有禮貌同耐心咁重覆答我，而我依然繼續趴喺檯台係咁求佢，同時又四圍張望希望見到佢嘅身影。
「真係唔可以啊小姐，不如你打俾你朋友問吓啊。」前櫃姐姐皺着眉頭說道，我都唔好意思再煩住人哋。
「佢唔肯聽我電話...」
呢間已經係附近最後一間酒店，我帶住失望轉身離開，我已經冇其他頭緒可以點樣搵到佢，而我亦都終於體會到當日我失踪嘅時候，佢嘅心情係有幾咁焦急同沮喪。
「嘟嘟…」
「嘟嘟…」
「你所打嘅電話暫時未有人接聽，請你遲啲再打過嚟喇。」
我望手機電量逐點逐點咁變少，心裡面越嚟越著急：「衰人你去咗邊吖...」
忽然間雨聲潺潺，只見周遭嘅途人紛紛急著躲到屋簷下避雨，雨勢越落越大，完全並冇要停止嘅跡象，我反而任由雨點將我身影淹沒其中，至少冇人會留意到我臉頰上嘅係雨水定係淚痕。
我漫無目的咁繼續喺雨中前行，逐漸逐漸覺得雙腿軟麻，越踏一步都要花上全身氣力，終於去到一刻，我索性就咁曲膝踎喺街上，無視其他途人嘅目光，耷低頭細聲啜泣。
雨點繼續無情咁灑落喺我身上，忽然間我反而寧願雨勢再落大啲，我甘願俾雨水狠狠咁拍打，就當洗滌我嘅愧疚又好，或者當係懲罰我都好。
又或者我只係純粹渴求，如果佢而家見到我咁樣，會唔會可以重新搏取到佢嘅憐憫，同佢再一次相遇。
時間唔知過咗幾耐，我意識逐漸變得迷糊，開始感受唔到雨點拍打我身體嘅痛感，但同時間雨點聲又變成響亮嘅「啪嘞啪嘞」聲。
嗯？
我俾水汪汪嘅眼眶擋住咗視線，只係依稀望見有一個高大嘅身影擔住把遮，筆直咁企喺我面前。
原來「啪嘞啪嘞」係雨點滴喺佢把遮上面嘅聲音，但係佢嘅臉容亦咁啱俾把遮擋住咗。