殘酷暗戀物語【最終部曲】: 愛比死更冷（下集）
「王樂兒...」
「王樂兒...」係咪我有幻聽？點解我好似聽到有人叫緊我...
「王樂兒...？」而且呢把聲好熟悉吖..唔通真係你返咗嚟搵我...？
「點解每次見親你都係傷痕累累㗎？」
我面前呢個高大嘅身影，踎低身，左手撐住雨傘，右手擦走我臉龐上嘅淚水，然後再將佢身上件襯衫外套，除咗落嚟披喺我膊頭上面，最後托住我手肘扶我起身，整個動作一氣呵成。
「你點知我會喺度㗎...？」我冇諗過，我朝思暮想嘅佢真係會重新出現喺我面前，霎時間眼淚又控制唔住，而佢又再一次溫柔咁幫我擦走淚珠。
「頭先我喺大堂等𨋢嗰陣，突然間見到你打開屋企度門，跟住你就一支箭咁衝去後樓梯。」
「到我落到樓下冇耐，你又向住另一個方向咁衝咗出去，我擔心你，於是我一直跟住你後面。」
「原本我諗住克制住自己唔好搵你，只係想跟喺你後面。」
「但我都係唔忍心睇住你一個女仔喺度淋雨，所以我就喺度喇。」
「同埋，乜你唔記得咗我呢個隊長，最鐘意跟蹤女隊員㗎咩？」講到最後，佢伸手捏住我面珠墩，我嘟起嘴，情不自禁咁伸拳揼落佢胸膛，只係越揼越細力，最後索性撲入佢懷抱裡面。
雨好似都停咗...
「正衰人，你唔准揼低我吖...」佢又食咗我一錘。
「唔准揼低我吖...聽唔聽到吖...」然後再連續食咗我兩錘。
「好喇，好喇，我邊會捨得揼低我呢個咁可愛咁又靚女嘅女朋友。」
佢將我緊緊咁抱實，一直輕撫住我嘅頭髮，雖然啲頭髮已經俾雨淋到濕漉漉，但佢依然好有耐性咁，一束束咁幫我梳返順暢。同時間，佢嘅體溫慢慢從佢身體傳遞過來，係我感受過最溫暖嘅感覺，如果時間可以永遠停留喺呢刻，咁我哋就永遠唔會分開。
不過我都知道呢個世界並無永遠，由開始嘅一刻就註定咗總會有終結嘅一日。
而且呢一日已經來臨。
佢將我輕輕從佢嘅懷抱裡鬆開：「咁調返轉，你揼低我。」然後指住我個心。
佢接住說：「如果你唔狠狠咁揼低我，咁我會好唔捨得你，我會日日掛住你，到時候我去到英國獨伶伶一個人我會好傷心。」講吓講吓，我見到佢開始眼泛淚光，睇得出佢只係好努力咁抑壓住。
「唔得吖，我唔准你唔開心。」我搖頭說著，同時伸手捏住佢面珠，我唔忍心再用拳頭打佢。因為佢都已經傷痕累累，再打嘅話，我會心痛。
「傻瓜，咁所以你快啲搵到新嘅男朋友，等我可以早啲死咗條心，忘記咗你。」佢輕輕捉住我隻手，從佢嘅臉頰上面順勢放返落嚟。
「對唔住吖...我完全冇為你做過啲咩...」而家諗返我覺得好內疚，喺呢段關係裡面，從來都係佢做付出嘅角色。
「嗱，如果你想報答我嘅話，你就應承我，俾我早啲忘記咗你，好唔好？」
「我會唔捨得你…」
「唔會啊，到時有男朋友陪你，你就會唔記得我。」
「你唔俾人哋一直記住你嘅...」
假如當初你冇出現過，就唔會有今日嘅王樂兒，所以你喺我身上遺留過嘅痕跡，即使隨住時間流逝而慢慢磨蝕，但過往種種嘅回憶都曾經迴腸盪氣咁存在過。
只要存在過，就唔會消失。
「夜喇，我送你返去先好唔好？」
喺呢趟路上，我哋兩個心裡似有默契，知道我哋剩餘嘅相處時間同步行返屋企嘅距離，已經劃上等號，我哋雙手十指緊扣住，刻意放慢腳步，好好咁珍惜埋呢段最後嘅時光。
佢同我解釋，點解佢選擇將移民件事隱瞞到最後一刻先至坦白，係因為佢擔心我知道咗之後會唔開心，所以佢情願強裝無事發生，盡可能延長我哋甜蜜愉快嘅日子。
因為我嘅任性，完全糟蹋咗佢嘅好意。
我問佢，頭先樓下個叔叔話，你爸爸媽媽已經飛咗去英國，咁點解你仲會留喺香港。
原來佢爸爸媽媽因為工作關係要提早去英國安頓，但係當時我仲喺歐洲，所以佢真係孤身一人留喺香港，租咗間酒店暫住，就係為咗等我返嚟。
因為我唔識得珍惜，所以我其實唔值得擁有佢嘅愛。
當刻呢條擠擁嘅街道上面，彷彿只剩低我哋兩人，喺日月星辰嘅見證之下，走完我哋最後一段嘅旅程，當到達分岔路口之後，從此以後我哋就互不屬於對方。
終於，我哋返到屋企嗰層嘅電梯大堂，以前佢每當送到我嚟到呢度，我都總會覺得好快我哋又會有下一次嘅見面機會，但係今晚佢再送到我嚟呢度，我哋兩個嘅心境都已經唔同咗。
我將件襯衫外套除返落嚟俾返佢，然後喺我個斜揹手提包裡面，攞咗我本精裝畫簿出嚟：「郭家朗，我有啲嘢想俾你睇，你可唔可以陪多我一陣？」
「睇咩嘢？」
「你自己睇～」我將畫簿揭去當日喺巴黎情人橋上畫下嘅嗰幅畫，然後遞俾佢，再擰轉面避開佢目光，唔想俾佢發現我已經臉紅耳熱。
「個男仔係邊個嚟㗎，畫得咁型嘅？」佢仲要將本畫簿遞喺我面前，指住個男仔問我。
「明知故問，咪你囉，正衰人。」係要人哋臨尾都要打多你一錘先開心嘅。
「王樂兒你有冇帶筆喺身？」
「嗯？」我摸摸自己個手提包，又真係有支鉛芯筆放咗喺度。
「我記得呢...佢左手呢個位置係有粒墨嘅。」佢攞住我支筆喺度比劃緊啲唔知咩嘢。
「喂吔，你做咩咁曳改我幅畫喎。」我挨喺佢身邊，望住佢喺畫上面輕輕咁畫咗粒點喺個男仔嘅手臀上面。
「傻瓜，唔係改，係我哋兩個一齊完成。」佢將畫中巴黎情人橋上面攬住我嘅嗰個男仔，由郭家朗轉換成曾皓賢，佢呢個簡單嘅舉動，唔知道背後蘊藏住幾多豁達、無私同對我嘅愛。
電梯門再次打開，郭家朗孤身行入𨋢裡面，我哋兩個四目相對，心裡面都知道𨋢門閂埋之後，我哋從此分隔兩地，可能唔會再有機會相見，但無論如何呢刻我哋都唔捨得離開雙方視線。
電梯門關上之際，我奮力擋住了𨋢門，向住佢喊道。
「第時你識到新嘅女朋友，你可唔可以話我知？」咁樣等我都可以唔會再抱假希望...
「嗯...如果你搵到新嘅男朋友，你都話我知，好冇？」佢點頭向我微笑。
「嗯，我一定會㗎！」
「我哋勾手指尾吖。」
門再次關上前，我哋互相許下最後嘅承諾。
我應承你，我會努力去追尋我嘅幸福。
你都一定要。
預告：星期三晚將會更新大結局