殘酷暗戀物語【最終部曲】: 我們都不是無辜的（下集）

或者，旅行嘅意義並唔係在於參觀咗幾多個名勝，試過幾多道異國佳餚，抑或認識咗幾多新面孔，有時候一趟旅程，簡單到可以只係同自己內心嘅一場坦誠對話，重新確認自己所渴望嘅究竟係咩嘢，當然，冇人可以保證一定會搵到答案。

義遊團只係為期兩個禮拜，我哋主要喺倫敦外郊嘅公園幫手做啲生態保育嘅工作，而呢段時間我同自己講，應該要暫時盡量放低喺香港嘅一切思緒，全情投入咗喺自己嘅義工崗位上面先，同埋享受每晚返到義工營裡面之後，同其他人一齊煮嘢食、傾吓偈、仲會有人玩音樂，其實都幾寫意。

我嘗試去認識唔同背景嘅朋友，佢哋每當有空餘時間就會叫埋我去市區參觀倫敦嘅名勝古跡，有啲男仔又會提議去佢哋鐘意嘅球隊主場朝聖，就算我從未都聽過嗰啲球隊名都好，每次我都會跟埋佢哋一齊去，就當係一次特別嘅體驗。

原來一班人柴娃娃咁周圍玩係幾開心嘅，但係呢種嘅開心感覺上亦都只係停留於過眼雲煙嘅程度，只係好似唔知喺邊度亦都曾經感受過呢種嘅快樂。

我記得當晚離家出走之前，我同佢傾電話嗰陣，仲假扮想早啲瞓覺收咗佢線，其實我只係要趕去機場，直至隔咗大半日我去到倫敦落機之後，電話多咗百幾條未讀訊息，我先知道原來第二日佢見我遲遲冇覆電話，擔心我會唔會又遇到嗰啲唔開心嘅事，佢摷勻晒屋企附近咁多個地方去搵我，都完全唔知道我去咗邊，直至我覆返佢我去咗英國。然後，我再將佢個對話框轉做靜音模式。





喺呢兩個禮拜，佢一直關心我、安慰我，仍然嘗試用唔同方法去引我覆佢，從來冇停止過，但我最多都只係影吓周圍嘅風景俾佢知道我喺邊就算。老實講去到呢刻，理應我一早已經滿足晒我嘅報復心，奈何我得到嘅只有內疚感，本來我應該喺義遊團結束之後就返香港，但係反而我選擇延長多兩個星期去荷蘭同法國，因為我已經唔敢返去面對現實。

倫敦坐夜船去荷蘭只需要一晚時間，喺呢趟船入面，有個亞洲面貌嘅女仔同我共睡一個船艙，佢起初以為我都係日本人，跟住我同佢講其實我喺香港嚟。佢問係咩原因驅使我一個女仔獨遊歐洲，佢以為我係嗰種好勇敢要闖蕩世界嘅女仔，我話我啱啱相反，其實我好懦弱，我係逃避緊一啲嘢先至嚟到呢個地方，然後我同佢傾吓傾吓就慢慢進入咗朦朧狀態。

船到岸時佢輕輕叫醒咗我，佢喺我仲係意識迷糊嘅時候同我講，其實逃避並唔可恥，有時候退後一步都係一種方法去重新確認自己最珍惜嘅係咩嘢。就係咁，我同佢就係碼頭分道揚鑣，去到荷蘭沉澱咗幾日，我先開始認真思考個女仔同我講嘅呢番說話。

嚟到旅程嘅第三個禮拜，我終於鼓起勇氣去重新睇返呢段日子佢send俾我嘅短訊，甚至我碌到最前由一開頭開始睇起。原來最初係我搵佢先嘅，我將中文科默書個範圍send俾佢，我記得事後佢仲同我講返，佢將成篇《出師表》背晒，我笑佢傻瓜，明明只係需要背頭兩段。

之後到我哋困喺儲物室嘅第二日，原本晏晝我哋要出席排球隊加操訓練，但係佢見我成程都冇出現過，佢唔剩止係咁打電話搵我，而且佢仲send咗好多短訊俾我，擔心我係咪唔舒服定係有其他原因，從字裡行間都可以感受到佢當時嗰種嘅關心，絕對唔止係寒暄問候。





校際排球決賽當日朝早，佢話好想我會去睇佢比賽，我突然醒起，嗰日比賽贏咗之後，喺慶祝同合照嗰陣佢不停咁四圍張望，其實應該就係想望我有冇嚟到現場，結果我最終都係令佢失望。

起初我去到英國嘅時候，佢好緊張咁問我點解粒聲唔出走咗去，但係我發現，每次我send相俾佢，佢都幾乎係秒覆返我，而且唔係純粹話「好靚喎」、「呢度邊度嚟㗎」呢啲求其敷衍嘅說話，而係佢每次都會好認真咁叫我唔好掛住影相啊，要小心啲有冇陌生人喺後面跟住我啊，又提我今日呢邊可能會落雨記得帶遮啊諸如此類。

就算我同佢之間相隔咗八個鐘頭嘅時差，就算我張相係咩時候send俾佢，就算呢邊係日頭佢夜晚，我夜晚佢凌晨，佢都依然照樣花時間同心機去覆返我，而偏偏我就喺度逃避緊佢。

當我發現咗呢點之後，原本嬲佢嘅感覺早已經蕩然無存，我開始積極主動去影多啲相俾佢睇，以前可能一日最多只係一張起兩張止，到而家我會盡量去發掘旅程之中得意嘅嘢，甚至只係我生活上細微細著嘅事，都會影底send俾佢分享。只係由唔知幾時開始，我發現佢好似冇再認真咁逐張逐張覆我，有時候會夾埋幾張一齊覆，有時仲會隔咗半日先覆返我…

呢日已經喺旅程嘅第四個禮拜，我喺巴黎市中心街頭散步，就算佢對我冷淡咗都好，我依然繼續努力咁搵可以引起佢興趣嘅嘢影俾佢。忽然間我注意到前面條橋，欄杆掛滿咗成千上萬個七彩繽紛嘅鎖頭，我認得呢條就係巴黎情人橋，世界各地嘅情侶都會慕名而來將愛情鎖掛喺情人橋上，寓意至死不渝嘅愛。





我諗返起去荷蘭嗰趟船個女仔同我講過嗰番說話，於是乎我喺背囊到拎咗本袖珍畫簿出嚟，行到去情人橋中央搵咗個位置坐喺地板上面，望住一對又一對嘅情侶將佢哋嘅承諾緊扣嘅同時，我亦都將自己心裡面覺得最珍貴嘅事物，用鉛筆慢慢一劃一劃咁描繪出嚟。

經過咗四個星期，我諗呢趟旅行嘅意義，已經寄存咗喺呢本袖珍畫簿裡面，我將佢由背囊裡面抽返出嚟，放喺我個斜揹手提包入面，然後掛喺膊頭，帶住佢起程返番去我原本嘅地方。