殘酷暗戀物語【最終部曲】: 我們都不是無辜的（中集）

我已經受夠俾人任意擺佈嘅生活，點解所有事情都要係你哋決定好晒，去到最尾嗰刻先嚟循例通知我，但我更加討厭嘅係，俾身邊最信任嘅人拋棄嘅感覺。
​​​​​​​
所以就算到時候去到歐洲，曾皓賢同曾佩淇佢哋兩小無猜咁一齊玩又好，我做足全程電燈膽都好，我都唔會有任何怨言，因為呢個係我自己嘅選擇。

既然郭家朗選擇呃住我，咁我都可以製造一個秘密出嚟呃返佢。我感覺到，我嘅戒心驅使緊自己默默咁築起一道圍牆，但係我咁做都只係想保護自己，唔想再受到傷害。

呢日夜晚，我返上屋企閂埋睡房門打電話俾曾皓賢，我同佢講，我決定會跟埋佢一齊去歐洲旅行。

「你問咗你男朋友喇？佢都去？」





「佢唔去啊，我想跟埋你哋去得唔得？」我冇同到郭家朗講呢件事，就係因為我想呃住佢，同時間我亦都唔會俾曾皓賢知道呢樣野。

「可以啊，不過曾佩淇話佢想去日本多啲，所以得返我同你兩個。」

「冇所謂吖，兩個去都好吖。」咁就唔使再擔心自己要做電燈膽。

「你幾時變到咁好㗎，中五嗰年約你去主題樂園，你都唔理我嘅。」

「咩吖，邊有唔理你，因為你約埋嗰班女仔去，咁我嗰陣同佢哋唔熟，你知㗎。」我記得嗰陣佢約埋區嘉桐嗰班排球隊女仔，我去嘅話只會係一個閒人。





「原來要單獨約你先會應承，明白晒。」

「明白你個死人頭吖。」曾皓賢對住我永遠都係咁口花花，只係唔知道佢對其他女仔係咪都係一樣。

不過，唔知個天係咪總係鐘意同我開玩笑，當我想瞞住郭家朗同曾皓賢一齊去歐洲旅行，偏偏最終就只係得我一個入選到個歐洲義遊團。

而DSE都過咗一半，郭家朗佢係文科生，我同曾皓賢就係理科生，所以自從四月尾考完中英數通識之後，我同郭家朗嘅考試時間就開始各行各路，呢日考完Chem之後，曾皓賢約我喺老地方茶餐廳見面。

「唔好唔開心喇，到時候我會影多啲相俾你睇。」曾皓賢同老闆娘落好單之後，我就安慰佢說。





「你真係諗住自己一個去？」點知調返轉頭俾佢關心返我。

「嗯，唔使怕喎，去到會見到其他義工㗎嘛。」

「係啫，但你男朋友真係肯放你去？」曾皓賢追問道。

佢係試探緊我同郭家朗嘅關係？畢竟自從上次我同佢推論完郭家朗嘅秘密之後，我都冇再喺佢面前提過呢個話題。

正當我唔知點答好嘅時候，老闆娘行埋嚟送上一杯熱奶茶同熱檸水，成功打斷咗我哋個對話，平時啲嘢飲都冇嚟得咁快，今次嚟得正好及時。 

「呃…得㗎喇，我會諗方法氹掂佢。」但我都係把握唔到老闆娘幫我爭取到嘅時間，去諗個好啲嘅答案。

「咁我呢？」佢遞包砂糖俾我，但又故意向後微縮。

「你都唔使我氹喇。」我嘟起嘴搶走佢手上面包砂糖。





唔知道係咪我嘅錯覺，我發現曾皓賢最近無論係言語上嘅挑逗，抑或係行為上嘅，都比以前多咗好多，但係令我意想不到嘅係，我自己居然會享受佢呢種對待我嘅方式。

呢段日子，我開始偷偷地準備去歐洲嘅行李，首先我要諗辦法收埋我新買嘅旅行背囊，四顧自己間房，唯獨是係個衣櫃最適合用嚟收埋啲嘢，因為呢個空間連我媽咪都唔會點理，郭家朗亦唔會睇我衣櫃，至於叔叔會唔會變態到打開嚟睇，我真係唔想去諗。

我打開衣櫃，思考緊可以點樣盡量騰出空間去安置我個背囊旅行，老實講平時我都好少會認真去睇自己個衣櫃，通常將啲衫裙褲掛好咗就算數，但呢次重新審視自己過往著過嘅衫嗰陣，我只係俾呢條純白色，但又密密麻麻寫滿晒字嘅校裙吸引住我視線。

我拎出嚟，逐段逐段字重新睇多一次，我又諗返起當日郭家朗為咗氹我開心而搞咗場「校園告別賽」，然後仲叫埋其他隊友一齊過嚟幫我寫校服。只不過，當晚我同郭家朗兩個沉醉咗喺愉快之中，最終都係唔記得咗幫大家互相寫校服。

我望住呢條校裙，心裡面縈住梗係少咗一樣嘢，呢樣嘢應該係嚟自於一個好重要嘅人，起初望嘅時候，淡淡然嘅遺憾油然而生；望耐咗之後，就覺得有時有啲嘢，過咗嗰個時機，再補做返，個意義就已經唔同晒，唔好諗住將啲嘢拖到最後先做，因為你永遠唔會知道個時機幾時會消失。

個旅行背囊逐啲逐啲咁俾我到塞滿滿，然後我就拉好拉鍊，靜待住起程去歐洲嘅日子。起飛當晚，我同郭家朗傾完電話之後，我靜靜咁孭起背囊，推開房門，穿過漆黑一團嘅客廳。
 
忽然間我醒起自己對波鞋已經收埋咗喺背囊入面，情急之下又唔想驚動到屋企入面嘅人，唯有喺鞋櫃度搵返嗰對綁帶涼鞋出嚟著，然後輕輕力扭開大門門鎖，喺無人知曉嘅情況之下成功離開呢個屋企，直去機場。





呢刻我聯想返起當初我誤打誤撞，第一次喺學校禮堂後台發現排球隊儲物室秘道嘅嗰種感覺，一種終於搵到屬於自己私密空間嘅感覺，一個能夠將我所有情緒暫存寄託嘅地方，通向無人知曉嘅世界。