殘酷暗戀物語【最終部曲】: 我們都不是無辜的（上集）
｛我們都不是無辜的—周國賢｝
…
「你尋晚又同邊個女人上床啊？」從房間裡傳來一把激動得顫抖嘅聲音，係我媽。
「痴撚線，你唔好成日響度思覺失調咁喇，以為全世界嘅男人都剩係識得去滾。」然後係另一把沉穩但又冷酷嘅聲線，屬於我爸。
「我思覺失調？好過有啲人做咗唔夠膽認。」我媽講到後面更刻意調高聲線，但隨即緊接住係一記響亮嘅打耳光聲。
「啊～」我媽發出一下尖銳慘叫聲。
我伏喺佢哋房門外偷聽著，莫名嘅憤怒同驚恐感覺同時湧至心頭，當我垂低頭向下望嘅時候，我見到自己雙手拳頭不自不覺間已經握到好實，同時呼吸起伏急促，瞬息之間腦海泛起一股念頭，好想衝入去喝止佢唔好再咁對我媽。
「你都唔方好得去邊㗎咋，你以為我唔知咩。」但係呢個時候我爸嘅吼怒，又如雷轟頂咁徹底粉碎咗我對呢個家庭嘅美好想像，房間裡混亂嘅吵鬧聲逐漸變到模糊不清。
「砰！」突然木門發出一下巨響，將我嘅注意力瞬間扯返嚟現實環境當中，然後房門猝然打開，我媽掩住雙眼奪門而出，直奔向洗手間，好似並冇發現到我嘅存在。我視線從我媽轉向地下，見到有隻棕色毛毛熊公仔攤咗喺房門嘅地板上面，我估應該都係頭先房入面衝突之中嘅連累者。
毛毛熊公仔係無辜㗎。我偷偷地將佢執起，轉身溜回自己睡房，將隻毛毛熊公仔放喺我床邊，同另一隻同款嘅毛毛熊公仔並排放埋一齊。
望住佢哋，我諗返起小六聖誕節嗰時，我爸帶我去玩攤位遊戲，最後贏咗兩隻熊啤啤，佢捧住兩隻公仔話呢隻送俾你媽咪，呢隻呢送俾我乖乖女，咁就啱啱好一人一隻湊夠一對。
———呢一日，係我升中三嘅最後一日暑假。
…
「媽咪吖，書簿津貼申請就快截止喇，你又話會俾埋啲收入文件我嘅。」
返到屋企之後，我見我爸媽道睡房門打開咗，我知道今日媽咪返夜更，所以應該得佢響屋企，於是我除咗對皮鞋之後就向住睡房方向喊道。
「好，你等我一陣。」房間裡面傳出既熟悉又柔和嘅聲線，然後係一連串開櫃閂櫃嘅聲音。
「喂吔，咁耐嘅。」班上面坐我隔離個男仔今朝仲約咗我一陣陪佢出去買書㗎。
「之前都唔使申請㗎，做咩今年一定要我整喎。」我開始等到有啲唔耐煩，於是行入間房裡面，坐喺佢哋張床度，伸個頭望吓我媽仲要整幾耐。
「呢度係媽咪嘅收入文件，呢份…呢份係你媽咪同你爹哋啲離婚文件，你交埋俾學校，應該就唔會問你爹哋嘅收入有幾多㗎喇。」
「吓…？」
我望住眼前呢份文件，標題寫住「暫准離婚令」，呢五個字深刻咁烙印咗我腦海入面，當我仲諗緊暫准係咪代表其實仲有商量餘地，但我隨手揭去後面嗰幾頁，見到有份附件寫住「暫准離婚令轉為絕對判令證明書」，呢刻我完全唔知道我應該要同我媽講啲咩好，我只係拎住呢疊文件耷低頭，默默咁行返去自己間房。
以前我覺得我爸媽間房好溫暖，我記得我細細個嗰陣我仲會有理冇理咁，一起身落床就衝入佢哋房，爬上佢哋張床攝喺佢哋兩個中間瞓覺，佢哋會一齊攬住我，然後問我放假想去邊度玩，我仲好天真爛漫咁答，我想匿喺你哋個被竇唔出嚟～
———呢年我啱啱升上中四，認識咗曾皓賢。
…
「我唔要吖，我唔鐘意吖。」我媽咪見我企咗喺餐廳外面遲遲都唔肯入去，於是乎走出嚟勸我。
「你都未見過，做咩咁快就話唔鐘意。」我媽雙手搭住我膊頭，用好溫柔嘅語氣望住我雙眼講，但我知道我唔應該俾佢成功軟化到我。
「我都唔識佢。」我根本就唔想知嗰個係咩人。
「所以而家媽咪介紹俾你識。」
我媽居然拉住我隻手直接行入餐廳裡面，我嘗試同佢鬥力不果，但入到嚟見到呢個餐廳裝潢格調優雅，肯定係為咗想我同呢個陌生叔叔初次見面時，留低一個美好嘅印象。
「叫人喇。」坐低咗之後，我媽用手肘輕力撞咗我一下提我同佢打招呼。
「你好。」我遵循我媽意願，向對住坐嗰個人，冷淡咁打咗聲招呼。
「你好啊，你叫咩名啊？」然後佢笑面迎人咁坐側一格，角度剛好對住我，散發住偽善嘅感覺。
「我叫王樂兒。」我完全唔想直視佢。
「同你媽咪一樣生得咁靚女，好喇，其實我同你媽咪係同事嚟嘅，我哋亦都商量過，你哋兩母女可以搬入嚟我屋企住，以後就唔使寄人籬下啦。」
佢嘅笑容，令我有種由心而發嘅討厭。
「快啲多謝人喇。」我媽又用手肘撞多我一下。
我純粹覺得，雖然呢間餐廳環境氣氛既清靜又優雅，但係整餐飯我都只係聞到一陣陣厭惡嘅味道。
———呢年我準備升上中五，但我從來未準備過要迎接之後發生嘅事。
…
正當我諗到入晒神嘅時候，郭家朗喺我眼前揮揮手，將我靈魂拉返入嚟地球。
佢見我頭先定晒形咁望住牆邊嗰疊紙皮箱，可能都心覺不妙，於是乎佢提議不如去佢間書房度溫書。
我原本都有呢個打算去佢書房溫書，然後我哋開始執拾枱面上嘅餐具，佢將啲刀碟放返入廚房，而我就帶埋啲溫書筆記走入去佢書房張床坐低，只係感覺上佢執嘢嗰陣，動作特別快，好似趕時間咁。
郭家朗入到房後，見我坐咗喺床邊，於是好興奮咁撲埋嚟我度，就係咁，我成個人軟癩癩咁俾佢壓咗喺張床上面，但我並冇抗拒到，因為我腦海裡面只係諗住另一件事。
「你有冇嘢想同我講？」我作最後一次試探性問道。
「我哋不如…？」佢含情脈脈咁望住我，哄埋嚟錫咗我臉頰一下，無視咗我條問題。
果然，全世界嘅男人都係會俾情慾衝昏理智，既然你見到我發現咗啲紙箱，但你依然選擇唔向我坦白，唔俾我知道個真相。
咁好吖，我都唔會同你講我呢刻已經決定咗，我會跟曾皓賢去歐洲旅行。
———今日我要攞返屬於我應得嘅主導權。