殘酷暗戀物語【最終部曲】: 相信一切是最好的安排（下集）

平時我同陳柏希都好少會用Whatsapp傾偈，所以我下意識感覺到佢突然搵我，唔會只係普通傾吓閒偈，於是我即刻拎起部電話覆返佢。

「做咩事吖？」

「你同家朗最近點啊？」

「OK吖。」我諗返最近我哋喺圖書館溫書都幾開心吖。

「咁就好喇。」





「我可唔可以問你一個問題？」忽然間我醒起有樣嘢想問吓佢意見。

「請～」

「你知唔知郭家朗佢鐘唔鐘意去旅行？」感覺上我好似問咗一條好白痴嘅問題，有邊個唔鐘意去旅行㗎。

「我諗佢想留喺香港多啲。」結果我得到一個出乎意料嘅答案。

「點解嘅？」





陳柏希冇再覆我了。

不過我梗係覺得，正常佢唔會無端端咁樣問我同郭家朗近況㗎喎，唔通係發生咗啲嘢？定係陳柏希頭先撞到我同曾皓賢喺茶餐廳見面，但係我諗諗吓又覺得，我只係同好朋友見面啫，做咩要搞到自己好似心虛緊咁。

…

因為考試臨近，所以呢個星期開始我請咗假，第二朝我瞓到自然醒先起床，擘大眼第一時間摸摸手機睇吓幾點，然後發現又有未讀訊息，當我滿心期待陳柏希答返我尋晚條問題嘅時候，原來今次係曾皓賢搵我。

「王樂兒。」





「你係咪真係想去歐洲啊？」

「我想吖，但我仲未問佢吖。」尋晚同郭家朗傾電話嘅時候，我唔敢問佢想唔想一齊去旅行，一來陳柏希話佢鐘意留喺香港，二來始終係同曾皓賢一齊去，郭家朗同佢又唔熟。

「拋底佢陪我去 :) 」冇見佢一排，講嘢都仲係咁。

「講笑咋。我問緊曾佩淇去唔去，加埋我同你，仲有你男朋友，啱啱好四人成團。」曾佩淇就係最後一個學期坐佢隔離嘅嗰個女仔，嗰陣時曾皓賢成日撩人傾偈，都唔知係咪真係同姓三分親。

「我等你好消息。」曾皓賢續道。

「嗯。」 我落床行入浴室梳洗好，換返件衫，入廚房拎咗袋麵包同花生醬，連埋我啲溫習筆記，就踢住拖鞋行落樓下準備去㩒郭家朗屋企個門鐘叫醒佢，尋晚佢話佢爸媽呢排都好忙，差唔多凌晨先放工返屋企，所以間屋入面基本上就只係得佢一個，佢話佢屋企冇人好悶，想我落嚟陪吓佢。

「叮噹！叮噹叮噹！！」 我連續㩒咗十幾下門鐘，先聽到有腳步聲行近，道門一打開，只見佢著住件背心同孖煙通，頭髮亂糟糟，隻眼仲未擘大，好明顯真係俾我嘈醒咗。

「喂吔，唔著褲。」我將袋麵包瞄準佢孖煙通嗰方向揈過去，佢腳步輕巧向後一縮就避開咗。





「我都未瞓醒...」佢一邊講一邊捽眼，佢未瞓醒嗰樣又幾得意，但同佢平時返學個形象有好大落差。

「懶瞓鬼，十一點幾喇仲瞓。」不過我自己就仲未習慣俾佢見到我啱啱瞓醒嗰樣，所以我梳洗好紥埋頭先落去搵佢，差啲想化埋少少妝，但又好似會太造作。

「點知道你會咁早落嚟。」佢行去梳化度摷起咗條校隊短褲嚟著。

「又係你尋晚叫我落嚟陪你嘅。」我就除低咗對拖鞋就咁赤腳入咗去佢屋企客廳餐枱，放低咗袋麵包同花生醬喺枱面，原本我諗住將手上面啲溫習筆記放喺佢書房入面，但諗諗吓都係唔好，照擺住喺餐枱上面先，一陣再算。

「你快啲去刷牙洗面啦，我搽麵包俾你做早餐。」我打開樽花生醬，發現自己缺少咗把餐刀同放麵包嘅碟。

「咁好嘅，整早餐俾我食。」但係佢心有靈墀咁知我想要啲咩，已經喺廚房攞咗把餐刀同碟放咗喺枱面。

「咁你之前成日都買晚餐俾我食。」我拎起把餐刀，將花生醬搽喺半邊方包上面，再對摺夾埋就完成。





就係佢梳洗緊嘅呢個時候，我驀然發現佢客廳房放咗幾疊乾淨未用過嘅紙皮箱，仲要係摺起咗，整整齊齊咁挨喺牆邊，我醒起中四嗰年我爸媽離咗婚，屋企都突然多咗好多類似嘅紙皮箱，但後來我媽咪就帶住我去親戚屋企住，所以我一直都唔知嗰啲紙皮箱係用嚟做咩。

啊！

我記得我媽咪後尾同我講返，佢哋離婚無耐我爸就同另一個女人移民去咗加拿大，連錢都冇寄過返嚟，如果唔係我爸咁樣揼低咗我同媽咪一走了之，我都唔使住喺叔叔屋企。我敢講，佢肯定冇諗過自己個女，會因為咁而遇到啲一世都無辦法忘記到嘅事。

吓，咪住先，咁唔通？

正當我喺腦海之中將新舊記憶碎片重新連接之際，咁啱郭家朗就喺呢個時候，從浴室入面行返出嚟，條濕漉漉嘅浴巾仲掛住喺佢條頸度。

「我準備好嚟食我女朋友...整嘅愛心早餐喇。」佢攞住條浴巾抹乾頭髮，聲線調皮地說道。

「食你個頭吖。」偶爾俾佢言語上佔下便宜，其實都甜蜜嘅，但係好似唔包括呢次。

我搽下搽下就差唔多將成袋麵包搽晒，見佢食得咁開心。





咁，我好唔好問佢點解有咁多紙皮箱放喺度。