殘酷暗戀物語【最終部曲】: 在錯誤的宇宙尋找愛（上集）
｛在錯誤的宇宙尋找愛—陳健安｝
呢晚返到屋企之後，今次反而係我主動打俾佢傾電話。
「我頭先打邊爐嗰陣係咪好醜怪？我唔知道自己原來飲少少就會醉。」原來飲醉咗嘅時候，係唔會為意到自己當刻做咗啲咩，但過咗一陣諗返起嘅時候，就會好想搵個窿捐入去匿埋。
「下次唔好飲咁多喇知唔知，你飲兩啖已經成塊面紅晒。」雖然郭家朗嘅語氣帶有一種責備嘅感覺，但同時又有好似大哥哥教訓緊小妹妹咁。
「你頭先唔阻止我…」咁等我將個責任推俾佢先，嘻嘻。
「有我喺度睇住你又唔同啊，但萬一我唔喺度嘅話，你就要識得保護自己知唔知？唔好傻下傻下俾人咁灌醉咗。」點知道佢竟然好語重心長咁答返我。
「知道喇，講到你好似要離開我咁。」但係聽到都係好受落，我發現自己聲線又不知不覺地變到好嗲。
「傻妹嚟㗎，我點會捨得離開你。」而佢嘅聲線亦都變得好溫柔。
「係呢，頭先我哋講自己畢咗業之後想做啲咩嗰陣，但係唯獨是得你冇講到，我問陳柏希係咪有啲咩秘密唔話得俾我知，結果佢一臉認真咁叫我問返你好啲。」忽然間我又諗返起呢個困惑咗我成晚嘅疑問。
「哦…柏希個死仔想嚇吓你啫。」即係陳柏希只係純粹想整蠱吓我？
「咁你可唔可以講俾我知，畢咗業之後你會想做啲咩吖？我都想知吖。」雖然佢話陳柏希只係想嚇吓我，但依然都係未解開我心裡面嘅疑團，所以我決定要追問落去。
「如果可以嘅話，你去邊度讀書，我就陪住你去邊度讀書。」郭家朗你抄人嘅，學我講嘢正衰人嚟。
「嘻，算你啦～」
「夜喇，早啲瞓喇，知唔知？」
「唔得吖，我想你陪多我一陣...」
...
...
第二朝起床後我打開部電腦，上網搵吓有咩兼職請人，無意之中發現到原來圖書館助理只需要中學學歷就可以申請，於是我用咗一個晏晝時間去執好份履歷表就去申請囉。點知過咗兩日咁快就有面試機會，好緊張吖，成世人第一次見工。
「大家好，我叫王樂兒，英文名叫Maggie，我今年準備考DSE…」
「唔係『大家好』啊，如果你前面剩係得一個面試官，你仲講『大家好』，咁就真係直行轉左離開返屋企等消息㗎喇。」郭家朗喺電話陪我練習見工時嘅自我介紹。
「喂吔，我已經好緊張㗎喇，你唔好再打斷我喇。」聽日就要去見工喇，但我連個自我介紹都仲係講到甩頭甩尾咁。
「傻瓜，唔使緊張，聽日見工嗰陣，你當前面嗰個人係我咁就得...」郭家朗你講就容易啫，但係你唔知道其實我見到你嘅時候，個心會砰砰跳，反而仲緊張…
「...唉，不過你到時要返工，咁我哋就冇得成見面。」佢隨即又道。
傻瓜嚟嘅，我又唔會走咗去嘅，我哋有大把時間可以見喎•ᴗ•。
...
...
可能你會疑惑，點解明明過多陣就要考DSE，我仲要走去搵兼職做，係咪傻咗，但係我返工除咗可以賺零用錢之外，另一個好處係放咗工之後又方便可以繼續留喺圖書館溫書，而最重要嘅係，我想快啲儲到一筆錢，遲啲搬出去住，唔使再喺叔叔屋企寄人籬下，亦都可以從此擺脫佢嘅魔掌，所以我同自己講，王樂兒你一定要俾心機撐住。
再辛苦都要俾心機堅持住。
今日係我第一日正式返工，第一日就俾人編排咗去坐參考書部嘅Counter，雖然參考書部唔會有人嚟借書還書，但係就會有好多同學過嚟登記自修區座位，跟住又會有啲讀者過嚟問吓你呢本書擺邊，嗰本書可以喺邊度搵到，好在有個男同事坐喺我側邊一直傍住我，如果唔係我一早就已經俾人問到口啞啞。
「我以為喺呢度我已經係最細嗰個，點知原來你得十八歲仲細過我，你嚟緊仲要考DSE？」佢叫Jeff，佢話佢今年讀緊社科Final Year，同我一樣都係兼職，喺度做咗大概半年，佢由朝早到而家同我講咗好多呢度要注意嘅嘢，佢又話呢度雖然有好多兼職都係大學生，但係考緊DSE都肯請就真係第一次見，可能係呢排人手短缺緊拙。
「吓？係啊。」我有啲唔係幾識應對。
「但係你要考DSE都仲返工，好叻喎，你兼顧到？」Jeff續問道。
「應該可以嘅，放咗工都可以留喺度溫書嘛。」其實我一啲都唔叻，我知道即使我努力溫書，都唔會考得上大學，但求有五科合格可以報High Dip就已經好滿足。
「不過你又慘嘅，第一日返工咩都唔識就俾人編咗過嚟坐Counter，今日仲要鬼咁多人過嚟問嘢，希望唔會嚇親你喇。」佢好快又轉咗話題，好似總係有無窮無盡嘅話題咁，其實係咪所有大學生都係咁健談。
「唔會吖，好彩有你喺度教我，我應該OK嘅。」所以我唯有好禮貌咁回覆佢。
「嗱你記得，如果有讀者想登記我哋前面嗰排自修區嘅話，就叫個讀者用張紙仔寫低個名，然後再抄落呢本白色登記簿度，之後就俾呢個黃色牌仔佢哋放喺書枱當眼位置，咁就可以㗎喇，記得唔需要問個讀者出示圖書證。」Jeff再次不嫌其煩咁提醒我呢個屬於基本入門嘅工作程序，接住又道：「不過如果你唔記得都唔使驚，我會喺度幫你㗎喇。」
正當此時，突然間有個無比熟悉嘅臉孔，失驚無神咁走埋嚟Counter，哄個頭埋嚟問。
「你好，我想問自修區係咪要登記？」
吓！！點解你會喺度㗎，雖然返工唔係啲咩唔見得光嘅事，而且暫時都係得你一個知道我喺度返工，不過就係唔知點解，俾你見到我返緊工個樣，會令到成件事變到好尷尬咁，原本我都有啲信心可以試吓自己一個幫人做登記，但係呢刻我只能夠呆咗咁坐喺度望住佢。
「係啊，麻煩你喺度用張紙仔寫低你個名，我哋再幫你做返個簡單登記就可以喇。」Jeff見狀以為我始終係新人仲係太緊張，於是乎企起身幫我「接待」咗呢位「讀者」。
「咦？佢都未寫完個名，做咩你已經將個名抄喺本登記簿度嘅？」當呢位「讀者」仲寫緊名嘅時候，Jeff見我手上支筆已經喺度郁動緊，就摀低身問我做咩事。
「吓？係喎...」我驚覺自己正喺度做緊啲唔合理嘅事情，明明前面呢位「讀者」都未寫完佢個名，正常我冇理由知道佢叫咩名㗎嘛，但正因為呢位「讀者」突如其來咁出現，搞到我突然間手足無措，竟然不自覺咁將佢個名，直接抄咗落本登記簿上面。
「啊囡，唔使咁緊張啊，慢慢嚟。」Jeff拍拍我膊頭，笑笑口咁安慰我。
「寫完喇。」呢位「讀者」寫完之後，將張紙仔繞過咗Jeff隻手，直接伸入嚟遞俾坐響度嘅我，雖然我無可能唔知道佢叫咩名，但係我循例都望一眼張紙仔寫咩，點知係大大隻字寫住。
「郭家朗」
然後下面嗰行細細隻字寫住：
「你男朋友上」
Jeff望一望張紙仔上面寫嘅名，再望返落去本登記簿我頭先寫底咗嘅名，再擰返轉頭望住我。
喂吔求吓你唔好望住我喇，好尷尬吖。
當郭家朗拎住個牌仔行咗去前面個自修區搵位之後，Jeff細細聲問我。
「原來你有男朋友㗎喇？」
「哦…係吖。」我仲有啲魂魄未定。
「你睇你男朋友係咁望過嚟你度。」Jeff用手肘輕輕撞我一下手臂，示意我望去前面嗰方向。
「吓？係咩…」我順住個方向望，果然見到郭家朗佢左手托住個腮，側住個頭，傻傻的咁望住我，當我哋目光對視嘅時候，佢向我展露咗一下微笑，但係佢枱面好似空寥寥連一本書都冇。
「你男朋友都幾Sweet喎，專登過嚟陪你。」Jeff笑說。
我忽然間醒起，今朝Jeff講過，如果發現有讀者使用自修區時行為不檢，我哋係有負責去主動提醒返嗰個讀者遵守返規矩。於是乎，我深呼吸一口氣，拎返住嗰張紙仔，趷起身整理一下掛喺我頸上面嘅職員證，然後轉身行去自修區嗰方向，只聽見我身後嘅Jeff輕聲問道：「做咩事？」
「有讀者行為不檢。」我冷冷的道，繼續向住嗰位「行為不檢」嘅讀者方向前進。
我直接行到去郭家朗面前，放低張紙仔喺佢枱面，板著臉說：「呢位讀者，麻煩你專心返啲溫書，多謝合作 Ծ‸Ծ。」
呢個時候我好似感覺到，坐喺旁邊啲同學用緊奇異嘅目光投射住我同郭家朗，從佢哋嘅眼神可以想像得到，佢哋心裡面應該諗緊：乜原來喺圖書館唔專心溫書，都會俾圖書館管理員捉㗎？