殘酷暗戀物語【最終部曲】: 在錯誤的宇宙尋找愛（下集）
霎眼之間，我同佢兩個四目交投，但我選擇耷低頭避開佢眼神，只聽見佢柔聲地說道。
「我唔記得帶書嚟溫。」
「先生，如果你有需要嘅話，可以去嗰邊個書架，上面有好多Past Paper，雖然呢度所有書唔可以借走，但係都歡迎讀者喺館內使用。」我運用住今朝學到嘅官腔語調去應付呢位「頑皮嘅讀者」。
「我唔識去啊，靚女姐姐你可唔可以帶我去。」但佢居然扮小朋友聲咁哎我帶佢去。我真係冇你咁好氣吖，我怒瞪佢一眼，不過始終都係心軟帶咗佢去搵書。
我同佢行到去附近嘅一個書架面前，呢度密密麻麻咁放滿晒林林種種科目嘅Past Paper，全部都係教評局出版嘅嗰種，每一本入面有嗰一年嘅DSE考試題目，多題目嘅例如係中英文科就會厚身啲同重啲，少題目啲嘅就自然會薄身啲同輕啲。
我有理冇理，總之見到係郭家朗佢要考嘅科，我就一股勁兒咁攞出嚟，直接撻喺佢心口度，佢用雙手捧住堆Past Paper，然後我越摷越快，佢手上面堆Past Paper亦都隨之而越疊越高，去到後尾，堆到個高度幾乎遮住咗佢下巴，至少都應該有三四十本，而我面前嗰排書架都差唔多空空如也。
我擰向右邊望住成手都係書嘅郭家朗，只見佢臉容依然係嗰個率性嘅笑容，對住佢而家呢個模樣，假如我再任性發小脾氣，亦只會加重我嘅愧疚心，而且我都驚咁多書真係會太重，於是我拍拍雙手上嘅灰塵，停手唔再喺書架上面摷書俾佢，並且說道：「好喇，你今日就做晒呢堆去喇。」。
「辛苦晒你喇，我返去溫書喇。」郭家朗捧住呢疊Past Paper，就轉身向住佢個位行返番去，我靜悄悄咁跟喺佢後面，但趁我哋左右兩邊仲有書架作為視線掩護之際，我心念一轉，忍唔住快步上前，伸拳揼咗落佢嘅背脊度。
「砰。」
哎呀死喇，我係諗住細細力咁打佢㗎咋，點知我用錯力打到砰一聲咁響，但係佢又無咩反應咁向住自己個位嘅方向繼續行，而我亦都要行返去Counter繼續當值，呢刻我已經冇可能兜喺佢面前去觀察佢嘅面色，唔知道呢吓攻擊係咪真係會整痛佢。
當我坐返埋位嘅時候，見到佢又真係好認真咁睇緊啲Past Paper，而且仲攞埋紙筆出嚟溫書，全神貫注咁冇再望過嚟我度，反而變咗係我坐響度望返佢轉頭，呢個時候我內心又渴望佢會擰過嚟望吓我，去到一個位開始連啊Jeff同我講啲咩，我都冇認真去回應。
「喂喂，夠鐘轉更喇，我哋返入去Back Office，睇吓有咩要我哋幫手。」Jeff拍拍我膊頭，將我個靈魂由仙女座星系拉返入嚟地球。
「嗯。」
我整理好枱面嘅文具，跟住Jeff身後離開Counter，我瞥見郭家朗托住頭好似聚精會神咁思考緊，並冇留意到我即將要離開。臨入去Back Office之前，我依依不捨咁擰轉頭再望多佢一次，直至閂門嗰一刻，佢依然專注緊自己個枱面。呢刻我反而有啲後悔，唔知道其實佢係咪嬲緊我大大力打咗佢一捶，所以先唔理我。
奈何我同佢之間而家俾幅牆分隔兩方，我再冇辦法知道佢做緊咩，但我思前想後，覺得最衰都係佢突如其來咁出現，令到我霎時間變到不知所措，搞到頭先我咁尷尬，所以我先至會有之後一連串唔正常嘅反應。不過諗吓諗吓，我又覺得自己呢種諗法難免太過自私，明明佢出於好意過嚟陪我，我又點可以咁樣怪佢。
「今朝買早餐嗰陣我買多咗包維他奶啊，請你飲啊。」Jeff見我神不守舍咁，又將我個靈魂拉返番嚟現實。
「嗯好吖，多謝你。」好彩有佢喺度，第一日返工總算順利，冇我想像中咁辛苦，跟住佢開始教我點樣整理啲新書資料，而我哋除咗工作相關嘅嘢之外，都冇再傾其他話題，大家只係埋頭苦幹面前嘅工作，幾乎冇離開過個座位。
我只係覺得時間過得好慢，好唔容易終於捱到六點鐘收工時間，但係唔知道郭家朗佢仲響唔響度呢？
我除底個職員證，塞返落個書包入面，Jeff行埋嚟笑笑口咁講：「你個Minions書包咁可愛，但呢個款好貴㗎喎。」其實呢個書包係我中五嗰年嘅生日禮物，不過我都唔知佢本身要幾多錢。
「嗯，佢兩隻手仔可以咁樣捹嚟捹去。」我喺佢面前搖一搖個書包，連住喺書包兩側嘅嗰對Minions手仔就左右左右咁搖晃著，都真係幾得意㗎。
「好喇，我走先喇。」Jeff向我揮揮手，率先推門離開，佢呢個舉動有意無意咁留返個私人空間俾我，等我可以自己一個人出去搵郭家朗。點知，原本郭家朗坐緊嘅位置竟然已經空無一物，我環顧四周張望，亦都見唔到佢嘅身影，苦在我今日第一日返工，我又唔夠膽去問同事，原本坐呢個位嘅「讀者」係咪已經離開咗。
衰人你去咗邊吖。
無可奈何之下，我盤算著唯有先離開圖書館，再打電話俾佢。點知一行到出圖書館門口，我就見到一個熟悉嘅身影企咗喺門外，擺晒姿勢咁挨喺幅牆度，左手拎住咗袋外賣，右手㩒緊手機。
「喂！」我向佢喊道。
佢聽到我叫佢之後，就將手機塞返落褲袋，慢慢咁行埋我度，拖住我隻手，傻更更咁望住我，打眼色向我示意佢買咗嘢食俾我做晚餐。
「你頭先做咩無啦啦走過嚟搵我吖？唔係講好咗，你接我放工再一齊溫書㗎咩？」我鼓起兩邊腮，裝作責罵嘅樣子向佢問道。
「咁我想把握每一分鐘見多你一眼呀嘛。」唔知點解我梗係覺得，從佢嘅聲線我可以聽得出，佢並唔係純粹氹我先講出呢句說話，而係真誠咁想嚟見我，我不知不覺間咬住自己唇瓣，心裡面嘅小脾氣一下子已經被衝散得無影無蹤，而內疚感又緩緩泛起。
「頭先我有冇打痛你？」我壓低聲線，捏著佢手臂問佢。佢聽完之後板起了臉，然後皺起眉頭擺出一副嚴肅嘅模樣。吓唔通佢真係有嬲到我？
點知道瞬間佢又放鬆面容笑道。「好舒服喎，好似按摩咁。」見佢個表情咁得戚，搞到我忍唔住伸拳揼落佢心口度：「咁你食多我幾捶喇！」
揼完一輪之後我都開始有啲肚餓，郭家朗話佢頭先已經探過路，得知附近有個公園仔乾淨得嚟又少人坐，我哋可以去嗰邊食完嘢再返圖書館溫書。
「頭先我喺圖書館門口撞到你個男同事。」郭家朗邊說邊幫我打開碗車仔麵個發泡膠蓋，又拆走埋筷子個包裝袋，仲要拎出嚟細心咁磨走晒啲木屑，我好似個小妹妹咁俾佢照顧到無微不至。
「你知唔知佢走過嚟同我講咩？」佢問道。
「唔知吖。」我伸手接過佢碗車仔麵。
「佢話：『你女朋友真係好靚女』」郭家朗再幫自己整理好餐具，又接住說。
「跟住我就問返佢：『想溝？』，點知佢居然奸笑咁就走咗去，迴避我條問題。」如果唔係佢提起Jeff，我幾乎已經忘記咗呢個足足幫咗我成日嘅同事。或者，愛情真係會令人盲目，佢會令到你剩係注意到佢美好嘅一面，甚至可以幫你短暫忘記身邊發生過嘅事物。
我哋食完嘢之後，執拾好殘餘嘅食具就行返去圖書館，佢專登帶我去咗另一層嘅自修區，廢時我見到相識嘅同事會尷尬。我哋埋去櫃枱一齊拎張紙仔寫低個名，做咗簡單登記之後，郭家朗就拖住我去自修區搵咗個冇咩人坐嘅角落安頓，佢坐喺我左手邊，我知道佢冇帶書出嚟溫，亦都知道佢其實只係純粹想嚟陪住我。
我問佢有冇咩特別想溫，我可以借啲筆記俾佢溫吓解吓悶，佢話冇咩所謂，於是我就拎咗份數學筆記出嚟，上面滿佈住我用唔同顏色筆寫嘅字跡，又有七彩繽紛嘅螢光筆間好晒啲重點，揭到後面仲有啲試題同空位可以用鉛筆寫答案，最後嗰頁仲有答案可以對添。
係吖，因為我一早估到佢唔會帶嘢出嚟溫書，所以呢份筆記係我尋晚專登整俾佢㗎，我順便遞埋部計數機同鉛筆擦膠俾佢用，細唔細心先。
就係咁樣，我哋兩個坐喺呢個寧靜嘅環境底下，享受住屬於我哋嘅微小空間，無幾耐之後，佢伸懶腰打咗個喊露，然後順勢用隻右手拖住我隻左手。
我怔一怔，但係佢二話不說咁，又繼續努力專注返喺我份筆記度，於是我輕聲問道：「你拖住我咁咪寫唔到字囉～」
點知佢懶型咁冷笑地說：「我練左手寫字。」
聽罷我忍不住嗤一聲笑咗出嚟：「傻瓜。」