殘酷暗戀物語【最終部曲】: 天空塌下前（下集）
「喂喂喂，不如我哋數三聲，一齊並排踏出呢個校門好唔好？」正當我哋臨離開學校之際，余澤安衝喺我哋面前攔住我哋，我見到佢塊面好似有幾條原子筆嘅痕跡，可能真係俾羅詠恩成功畫花咗塊面。
「我哋咁多人邊夠位啊？」羅詠恩第一時間又頂撞佢。
「得㗎啦，企密啲就得㗎啦。」余澤安一邊講，一邊井井有條咁安排我哋企好佢心目中嘅陣型，仲叫我哋互相搭住隔離嘅膊頭。
「嗱預備！三...」余澤安準備發號司令。
「喂喂等陣先，發號司令呢個動作係咪應該交返俾隊長會好啲呢？」陳柏希截住余澤安，打斷佢倒數。
「是但喇！一齊嗌咪得囉！」郭家朗說著同時，輕輕咁拖住咗我隻手。
「三！」
「二！」
「喂喂喂喂咪住先，係數到一就一齊行，定係數完一先一齊行？」自稱好多女仔搵佢簽校服嘅鄭梓豪又打斷咗個倒數。
「頂你鄭梓豪，數到一就一齊行啦！」你咁樣打斷佢，郭家朗佢會唔耐煩㗎。
「三！」
「二！」
「一！！！！」
我哋十二個人，同一時間踏出學校呢道大門，呢個地方曾經見證過我哋人生最青春嘅時光，但係如今走出呢道大門之後，往後嘅路係平坦定係崎嶇，我哋亦都冇人可以預料得到。
跟住班男仔就喺學校門外開始討論食咩好，不消一會就得出結論去附近間火鍋酒樓打邊爐，因為既係任食，又唔限時間，最緊要係大家可以坐埋一枱。其實，成班中學生著住件花呢花綠、寫滿晒字嘅校服喺酒樓打邊爐，仲要行出行入去夾食物，喺其他食客眼中肯定好惹人注目，不過青春就係咁㗎喇，我哋而家係唔會介意其他人嘅目光㗎。
歡樂嘅時光原來真係會過得特別快，又過咗一陣已經有幾個男仔開始飲到醉醺醺，佢哋越傾越興奮。我喺呢個氛圍底下，無視咗郭家朗嘅反對，主動咁要求咗一小杯啤酒試吓，飲咗兩啖之後，我就擰轉頭問郭家朗：「你…要唔要...都飲吖？？」
郭家朗只係淡淡然咁答：「我唔飲，我飲咗一陣點送你返去？」唓…咁無聊㗎你……個個都喝你唔飲，嗯…點解塊面好似㷫㷫地咁嘅。
大家討論嘅話題開始轉移到畢業之後有咩打算，有個人提議我哋不如逐個逐個咁講自己想做啲咩，邊個唔講就要罰飲酒，有個男仔話想玩音樂做結他手，有個話想打大專排球比賽，跟住區嘉桐話佢想做小說家，啊唔係，好似係周汶晴先係想做小說家，咦係咪呢？死喇唔係好記得...
當佢哋問到我嘅時候，我好爽快咁答。
「郭家朗去邊度讀書，我就跟住佢去邊度讀書～～」
佢成班一聽到之後個個忍唔住哈哈大笑。
發生咩事，有咩咁好笑吖？？
然後我先醒起自己居然唔小心將自己內心嘅諗法，衝口而出講咗出嚟，即刻雙手掩住自己嘴巴。
「王樂兒你唔好再飲喇，你塊面紅晒啦。」我見郭家朗隻手喺我枱面度嚷嚟嚷去好似表演魔術咁，跟住原本我面前杯啤酒就變咗做透明色。
跟住呢？吓？點解唔問埋郭家朗佢想去邊度讀書嘅？佢都未答...搞錯吖...都唔跟遊戲規則嘅。但係呢個時候我又留意到大家嘅眼神好似有啲遲疑，點解冇人去追問郭家朗㗎？係咪有秘密唔肯講！！我忽然間醒起陳柏希係佢嘅好朋友，咁佢肯定知道內情，但佢又好似迴避緊我眼神。
唔知做咩個話題突然間又轉咗去講訓導主任嘅壞話，佢哋話訓導主任其實好蠢，但我唔係好聽得清楚佢哋點解話佢好蠢...
隔咗一陣，我都唔知其實隔咗幾耐，我趁去廁所環節嘅時候，偷偷地爬過啲凳去搵陳柏希，問佢知唔知點解大家放棄唔問郭家朗畢業之後嘅打算，我問佢係咪有啲咩秘密唔話得俾我知？
佢今次唔再係暖男語調，而係好鄭重咁同我講：「我建議你都係親口問佢好啲。」
…
…
食完飯同大家道別過後，郭家朗扶住我行返屋企，沿途經過屋苑商場。
行行吓我見到隔離間賣鞋鋪頭，有對米白色嘅綁帶涼鞋好靚，就好似人哋啲韓國女仔著嗰種咁，我拖住郭家朗走入去問店員可唔可以試著，著上腳之後我不停對住塊鏡左照右照，完全唔願意除返出嚟俾返人哋，搞到人哋都有啲唔好意思。雖然對鞋真係好靚，但係要成三百幾蚊吖！咁貴我點捨得買，而且我銀包都冇袋咁多錢，但係郭家朗話既然我鐘意，就買俾我當係我嘅Last Day禮物。
呼～今日真係過得好開心，仲要有禮物收，聽日一定會更加開心㗎啫。
我真係好唔捨得今日咁快就要完結，返到屋企就好似等如宣佈中學生涯終於要畫上句號，即將要揭開人生新嘅一頁，咁我寧願永遠停留喺呢段時光入面。於是乎，我借啲意扭計要佢陪我去海傍公園散步，而呢個鐘數已經冇咩老師或者同學會經過，我哋索性伸臀互相攬住對方並肩而行。
原來兩個人同一步伐嘅感覺係好微妙，就好似連彼此之間嘅心跳頻率都變得同步一致。
不知不覺間，我哋嚟到附近一個遊樂場，入面有個韆鞦冇人玩緊，我童心湧現嚷著要玩。但係，我坐上去之後出盡腰力搖極都搖唔郁，俾郭家朗見到呢個畫面，佢肯定覺得我好蠢啦。我再出盡力去搖，但係佢唔郁就係唔郁，佢唔聽話我都冇佢符㗎。
郭家朗笑笑口咁揼低個背囊喺旁邊，繞到我背後說道：「王樂兒，我幫你喇！不過你要捉實先喎！」當佢叫我捉實嗰陣，佢隻手亦都輕輕捉實我隻手，確保我真係捉好咗條韆鞦鐵鍊。
「我捉到好實好實喇......」我說。
然後下一秒就感覺到佢緩緩用力將韆鞦拉後，我嘅視線由原先嘅水平線位置，慢慢開始向下望到地板。當佢放手嘅一刻，我成個身體即刻隨住韆鞦嘅擺動而拋上半空，我完全唔夠膽鬆開對手，眼前只有漆黑一片嘅天空，隨之而來嘅離心力，嚇到我驚慌失措：「嗚啊啊啊！！！！」
一飛衝天～～～～ 喔，酒醒了...
當韆鞦飛到最高點之後，跌返落嚟嗰下郭家朗喺後面扶住我背脊，然後佢再俾力一推，我又再一次拋到上半空，起初我覺得每次去到最高點嘅時候，眺望住黑矇矇嘅夜空，都會有種莫名沉重嘅壓迫感，個感覺好可怕，但係當習慣咗呢個感覺之後，我知道，無論我飛到幾高又好，眼前有幾黑都好，郭家朗都總會喺後面接實我，所以我決定放膽去享受，越玩就越覺得好刺激，唔想停落嚟。
直此呢刻為止，我都以為自己係世界上最幸福嘅女仔。