殘酷暗戀物語【最終部曲】: 天空塌下前（上集）
｛天空塌下前—per se｝
校園告別賽，以訓導主任衝落嚟喝停我哋作為終結，不過大家都知佢其實已經好好人㗎啦，破晒例俾我哋咁多個玩到咁晏先趕我哋走。
天空上嘅雲霧喺夕陽照射之下，就好似一塊塊絢麗霞紅嘅花布，我哋喺呢個咁浪漫嘅氛圍底下，一邊拆網執拾，一邊依依不捨咁感受埋呢段最後時光。
「個天今日好靚吖！」旁邊有個短頭髮嘅女仔難掩心中嘅喜悅。
「唉！冇機會返嚟打波喇。」另一個聲線粗獷嘅男仔表達不捨之情。
「我唔想畢業啊！」另一個戴住圓框眼鏡嘅男仔仰天長嘆。
我都唔想畢業吖，我唔想以後冇得同郭家朗一齊返學放學，冇得同佢一齊食晏同溫書，冇得一齊打波，冇得一齊行街拍拖。
咩吖王樂兒！佢只係住你樓下，點會冇得一齊行街拍拖喎，但係我心入面始終凝住凝住，畢咗業之後我哋彼此嘅距離就可能會越行越遠。
「頭先啊，區嘉桐有球發球俾王樂兒擋起咗，跟住家朗一下跳高扣殺，型到呢！你哋記唔記得？」戴住圓框眼鏡嘅男仔開始回溯返頭先告別賽嘅片段。
「係女朋友助攻俾男朋友得分啊，呢啲叫做恩愛，你識條鐵咩！」聲線粗獷嘅男仔回應。
喧鬧之中，我望見有個排球孤伶伶咁漏咗喺球場角落位置，於是我就諗住行過去幫手執返起佢，忽然之間有把女仔聲出現喺我旁邊：「喂王樂兒啊，點解你件校裙仲係咁空寥寥㗎？」我往右回望，原來係一個叫周汶晴嘅女仔拍拍我膊頭問我。
「一…二…三，吓？竟然得三個人幫你寫咋，搞錯吖！做咩唔搵多啲人幫你寫吖？」周汶晴圍住我轉咗一圈去數我身上面有幾多個人簽名，我認得佢係郭家朗嘅同班同學。其實，留短頭髮嘅周汶晴，再加上佢開朗嘅性格都幾得人鐘意，只不過以前練波嗰陣我哋都好少傾偈。
「可能係我人緣唔好，大家唔鐘意我…」我俾佢突如其來咁問，搞到有啲不知所措，於是乎唔小心將真心話發自內心咁講咗出嚟。
「點會吖，我哋係你朋友嚟㗎嘛。」周汶晴好雀躍咁搭住我膊頭，然後向住班男仔揮手問：「喂，你哋仲有冇筆喺身吖？我想幫王樂兒寫校服吖。」
「啊豪佢今日係咁搵女仔寫，佢肯定收埋好多筆啦。」陳柏希指住旁邊一個差唔多有一米九嘅健碩男仔，我記得郭家朗成日同我講佢就係球隊皇牌得分手鄭梓豪，而且把聲夠粗獷可以嗌窒對手。
「頂你咩陳柏希，邊有搵女仔啊，啲女搵我就有。」真係俾陳柏希講中咗，鄭梓豪喺褲袋摷咗埋幾支五顏六色嘅筆出嚟，跟住佢將啲筆遞晒俾周汶晴，周汶晴就開始喺我背脊搵位置寫。
「吖，好癢吖。」可能因為周汶晴就住度力嚟寫，所以俾起頭先曾皓賢寫嗰陣仲更加癢。
「哈哈，原來王樂兒你怕唧嘅！」周汶晴用手指掃我條頸作勢要唧我，我身體下意識即刻向內縮。「你怕唧個樣好可愛吖。」雖然佢手指已經冇掂到我，但係我仲喺度自己縮緊。點算好，好醜怪添。
「好喇好喇，唔唧你喇。喂啊！我一個人用唔到咁多支筆㗎，你哋要唔要過嚟一齊寫啊？」我見到周汶晴拎住手上啲筆喺度攘咗兩下，示意其他人過嚟。鄭梓豪係第一個和應佢嘅人，跟住陳柏希同其他人都放低咗手頭上嘅嘢圍埋過嚟。
「喂你哋啲男仔唔好圍咁近啊，唔準趁機抽水㗎。」唔知點解喺短短呢幾分鐘，我覺得周汶晴佢其實真係好好人，我後悔以前一直冇好好咁同佢相處過。
「咩啊，有家朗喺度，我哋點敢啊。」呢個男仔我認得佢叫余澤安，佢都係郭家朗嘅同班同學，最有印象係佢副圓框眼鏡，好有復古味道。
「哦！啫係郭家朗唔喺度你哋就敢啦。」佢係我同班嘅羅詠恩，我同佢中三就開始同班，但記憶中佢好似由中二開始就已經入選咗排球校隊。
「羅詠恩你講咩先，唔好屈得就屈喎，我出咗名呢係好男仔嚟。」余澤安帶點不屑，反駁笑道。
「好男仔，所以咪讀咗六年中學都係收好人卡，冇拖拍囉。」點知道羅詠恩一瞬間就窒到余澤安出唔到聲。
「嗱～你哋記得要留返個位俾家朗啊，知唔知道？」陳柏希寫完之後交低返支筆，再同大家講。
「大家聽到喇，心口位置唔准寫，嗰度係隊長嘅專屬位置嚟㗎，知唔知道？」當余澤安講到「知唔知道」嘅時候，專登模仿返陳柏希嘅標誌性語調，隨即俾羅詠恩一下大大力咁拍中個頭，余澤安轉身逃跑，羅詠恩再追住佢跑，鬧佢唔好再言語上性騷擾我，但我感覺上佢哋似係響度打情罵俏多啲。
「余澤安你唔好走吖，信唔信我攞支筆畫花你塊面！」羅詠恩跑得唔夠佢快，我知道其實余澤安都係純粹講吓笑，並無惡言，但係我感覺到自己隻耳仔好似已經紅晒，或者可能成塊面都已經紅卜卜。
正當此際，我喺人群當中望見區嘉桐行咗埋嚟，粒聲唔出咁拎起咗支筆喺我左手衣袖度寫咗幾隻字，跟住就轉身行開咗，我好奇即時望一望佢寫咗啲咩。
「ごめんね，桐。」
咦，原來係日文字，究竟係咩意思呢？
周汶晴捉住我衣袖，側頭望住啲日文字，一個音一個音咁慢慢嘗試拼讀出嚟：「Go…Men……Ne？」
「係Gomenne。」周汶晴解讀成功。
雖然我唔識日文，但係我都認得出呢個讀音係解做「對唔住」嘅意思，原來區嘉桐係同我道歉。
一怔之間，我即時想追上前同區嘉桐講其實我從來冇嬲過佢，不過我俾佢哋圍住寫緊字又行唔郁。咁啱呢個時候，區嘉桐回身望返過嚟，我趁呢個機會向佢微微彎身點頭，同佢微笑而對——好多謝你吖，多謝主動俾咗呢個機會我哋冰釋前嫌。
「喂喂王樂兒小姐，唔好郁啊，啲字歪咗喇。」佢哋初頭寫嘅時候，我仲會覺得好癢，但慢慢就開始習慣咗呢種感覺。此時天色逐漸昏暗，球場射燈照耀住我哋呢班仲未捨得走嘅中六生。我回想返起，其實喺學校呢個地方，有好多人曾經帶過好多美好嘅回憶俾我，包括有郭家朗、曾皓賢，仲有陳柏希，又有周汶晴、區嘉桐佢哋咁多個。
但奈何今日已經係最後一日，以後都冇得再同佢哋一齊讀書同打排球，好好彩今日可以喺呢場校園告別賽入面，同佢哋一齊玩到最後一分鐘，但我更加冇諗到嘅係，最後大家圍埋嚟幫逐個逐個幫我簽校服寫感言，可以俾我感受到一陣又一陣嘅熱情溫暖。
當諗到呢度，我開始忍唔住自己嘅眼淚。
我伸手遮住自己塊面，嘗試唔好俾人見到我眼濕濕個醜怪樣，但從手指隙之間，我依稀見到郭家朗喺儲物室行出嚟，拎住張紙巾行埋嚟我面前攤開，然後攞開我隻手，再清脆利落咁幫我印走眼眶上嘅淚珠，二話不說伸手將我直接抱入懷裡。
郭家朗輕揉着我啲頭髮，帶點冷酷地說：「我原本唔係諗住嚟整喊你㗎喎。」聽到佢咁講，我腦裡突然靈光一閃諗到，唔通頭先所發生嘅一切，都係郭家朗為我而安排嘅？但見佢哋咁多個都係滿腔熱誠咁嚟幫我寫校服，完全唔似係刻意安排出嚟。不過，即使真係郭家朗叫大家咁做，我都好感激佢哋每一個，願意為我而花時間，喺中學最後呢段時光，帶俾我一個咁難忘嘅回憶。
我輕輕掙脫咗郭家朗嘅懷抱，轉身面向住佢哋咁多位，四十五度角挺背彎腰，出盡渾身氣力說：「好多謝你哋吖，我會好唔捨得你哋㗎…」又再一次，我將自己內心嘅感受毫無保留地表達咗出嚟，但同上一次唔同嘅地方係，今次我感覺到，我好似多咗一班朋友。
「嗱，第日我哋仲有大把機會可以見㗎嘛，而家我哋去食晚飯好冇？」郭家朗打完場說道。
學校大鐘時針擺向六點正，準時嘅保安叔叔如常地將排球隊儲物室嘅鐵門鎖上，我凝視住呢度鐵門，祈望當關上呢度鐵門之後，可以代表住以往一切唔好嘅回憶，能夠從此封印喺入面，然後我就可以重新啟動另一段新嘅旅程。雖然，聽日呢個地方依舊會一切正常，其他排球隊隊友仍然會響度繼續延續佢哋嘅故事，但係原本屬於我嘅故事，亦只盼能夠由呢刻開始，從此暫告一段落。