殘酷暗戀物語【最終部曲】: 在空中的這一秒
｛在空中的這一秒—林家謙｝
呢晚我唔想返屋企見到嗰個人，郭家朗話佢爹哋媽咪去咗酒店倒數聖誕，所以今晚只會得佢一個喺屋企，如果我唔介意嘅話，可以喺佢屋企瞓一晚，到聽朝再諗方法返屋企。
「你放心，我今晚喺客廳瞓梳化，你可以鎖埋睡房門。」
佢可能都明白發生咗咁多事，仲要突然間俾個男仔問要唔要喺佢屋企獨處一晚，正常女仔都會好抗拒，所以佢先要咁樣講到明我哋會分開房瞓，係想等我可以放心好好咁瞓返一覺，但其實我自己又冇帶屋企鎖匙，銀包同電話又唔喺身，今晚除咗去佢屋企之外，我都諗唔到仲有咩地方可以去。
去到要瞓覺嘅時候，我坐咗喺佢睡房門口，隔住門隙問佢：「郭家朗，乜你唔會嫌棄我咩？」從門隙望出客廳，可以見到佢翹住腳咁攤咗喺梳化上面，用手機睇緊今日比賽啲精華片段。
佢放低部手機，喺梳化爬返起身望住我個方向，苦笑說道：「傻妹嚟嘅，其實我先至係要擔心俾人嫌棄嗰個，因為我冇辦法好好咁保護到你。」
我急道：「唔會吖，如果冇咗你，我今晚可能就要喺避寒中心過夜。」
所以，無論如何你對我嚟講都係好重要。
佢續道：「夜喇，早啲瞓喇，聽日幫你搵開鎖師傅。」
呢一晚，嗰道睡房門，我只係由佢虛掩就熄燈瞓覺，因為我根本就從來都冇懷疑過佢會對我做啲咩。
但係夜晚我發咗個好奇怪嘅夢，我夢見有個男仔爬上我張床度，我聽得出佢把聲有啲似曾皓賢，然後我居然喺佢面前慢慢解開咗個胸圍，仲要捉住佢隻手放喺我胸脯上面不停揉捏。突然之間，佢成個人哄埋嚟，輕輕用手托住我下巴，作勢錫落我嘴唇度，呢刻我先驚覺佢個樣面目猙獰，根本就唔係我所認識嘅佢。
我嚇醒咗，捽一捽眼，回想返起簡單係難以置信。
…
…
…
…
…
時間又一日一日咁過去，相隔當日校際排隊決賽已經過咗一個月，呢日終於嚟到我哋中六生嘅Last Day。
回首一望，我仲記得初初升中一嗰時，我完全冇概念究竟六年嘅中學生涯係有幾長，感覺上DSE同畢業呢兩樣野同我簡直係係遙不可及，點知霎眼間就已經升到上中六，日子就不斷咁倒數而且時間仲要好似越過越快，估唔到告別校園嘅呢日終於要來臨。
呢日大部分上堂時間都係自由時間，但只要一到小息時間，成個班房同成條走廊就會鬧到熱哄哄，大家圍埋一齊影相留念，互相喺校服上面簽名同寫感言，校服就變咗做以前嘅小學畢業嘅紀念冊，邊個件校服有最多人簽名，自然就代表佢嘅人緣最好。
熙熙攘攘當中，我喺度諗，唔知郭家朗而家做緊咩呢，希望唔會有太多女同學搵佢影相啦。我忍唔住想行去隔離課室偷偷地䁓吓佢做緊咩，呢個時候曾皓賢跑過嚟搵我：「王樂兒，等我做第一個喺你校服簽名嘅人喇！」我未嚟得反應，佢已經拎咗支原子筆喺我背脊開始寫字。
「好癢吖。」我第一次俾人喺我背脊寫字，感覺好奇怪好癢，本能反應縮咗一下。
「唔好郁喇，你郁我啲字就會歪晒。」我知道曾皓賢好執著寫字一定要靚，於是我就乖乖地企定定俾佢寫。
正當曾皓賢專心寫緊嘅時候，我開始有啲好奇佢寫咁耐究竟寫緊啲咩，而陳柏希就響呢個時候走咗入嚟我哋班房，對住我好熱情咁打招呼：「王樂兒，你好啊～」依然係佢標誌性嘅暖男聲線。
我點點頭向佢回禮，陳柏希續道：「家朗佢頭先即興諗到，今日放咗學四點鐘，我哋排球校隊嘅中六畢業生喺操場搞返場『校園告別賽』，佢叫我同你講一陣球場見。」說罷就跟我揮揮手離開班房。
吓咁點解郭家朗唔親自同我講嘅，我有啲失望，於是沿住陳柏希離開嘅方向望過去，見到原來郭家朗企咗喺我哋班房出面個走廊，翹住雙手咁望住我，當我哋視線重疊埋一齊嘅時候，佢就往後轉身離開，消失喺人群當中。
唔通係因為佢見到曾皓賢喺我件校服寫緊嘢，所以先叫陳柏希入嚟同我講？一諗到呢點我就有啲內疚，好想追返出去同佢講聲對唔住，但係奈何曾皓賢仲未寫完，我又唔想打斷佢。
…
朝早大家著住套乾淨白雪雪嘅校服返學，放學嘅時候每個人件校服喺不經不覺間，已經滿載住同學們嘅告別感言。我喺裙袋拎部手機出嚟望一望，發覺原來已經差唔多四點鐘。
我從走廊望落去操場，見到陳柏希同其他男子隊隊員響度搭緊網架，我再䁓吓隔離班班房，見唔到郭家朗喺入面，於是我就落去球場睇吓有咩可以幫住手先。
「王樂兒～你幫我喺儲物室入面推一車排球出嚟啊，唔該你啊。」落到去之後，未等我開口陳柏希已經交付咗任務俾我。
我行入儲物室，就見到郭家朗原來喺度幫緊啲排球泵緊氣，我即時意會到陳柏希叫我入嚟嘅意圖，我趁機同郭家朗道歉：「對唔住吖，頭先因為曾皓賢喺我後面寫緊校服，所以我出唔到嚟搵你。」我好似個小朋友做錯事咁鼓起兩邊腮等俾人鬧。
郭家朗放低手下嘅泵氣筒，轉身面向我笑道：「傻妹做咩講對唔住，你推咗呢車排球出去先喇，差唔多要開始㗎喇。」
「嗯～」聽到家朗語氣依然係一如既往咁溫柔，我個心終於可以舒服返啲，然後重拾鼓勁地將手推車推出去球場。
猜包揼分好組之後，郭家朗就以「前隊長」身份向大家宣佈「校園告別賽」正式開始，第一場陳柏希同區嘉桐仲有其他女仔分咗去對面隊，而我居然好好彩可以分到郭家朗同一隊 ≧ω≦ 。
大家著住件寫滿晒字嘅校服喺學校操場上面打排球，我諗呢個機會應該都只會係人生唯一一次，而我留意到企前排嘅郭家朗件恤衫都密密麻麻寫滿晒嘢，我先猛然醒起，我同佢都未搵對方寫感言。
笛聲一響，對面隊由區嘉桐先開發球，個波向我方向猛速靠近，我座底下盤準備迎接呢下攻勢，只見郭家朗擋喺我面前將波一下推高，同一時間旁邊嘅男子隊隊友已經預判好到排球墜落嘅位置，凌空一記扣殺，整個動作清脆利落，我哋成功先取一分。
「Yush！」久違熟悉嘅勝利歡呼聲瞬間響遍球場，熱汗灑地嘅場面又重現眼前，亦開始吸引越嚟越多同學圍觀呢場校園告別賽，場內外嘅歡呼聲此起彼落，我亦都漸漸樂在其中。
告別賽隨即進入白熱化階段，雙方來回對擊之下，郭家朗幫我擋住一下又一下攻勢，但係佢今次唔小心失手將個波擋遠咗，落咗去對面區域，區嘉桐趁住家朗失位之際，把握機會馬上躍高凌空扣殺，皮球向我直飛而嚟，未及時反應得切嘅我，最終俾個波打中面頰。我留意到郭家朗想行上前想破口大鬧區嘉桐，但隨即又欲言又止，擰過身嚟望住我，我忍住痛楚向佢擠出一個微笑，說道：「我冇事吖，唔好嬲啦。」
俾著喺以前，我覺得佢已經衝口而出，但今次佢識得控住團怒火，冇當住咁多隊友同同學面前鬧人，所以我就算再痛我都覺得係值得嘅，於是我抹一抹面上灰塵就企返好位置。
對面隊取得一分之後，由區嘉桐再度發球，今次我同自己講，唔可以再依賴郭家朗幫我擋波㗎喇，所以我主動企前兩步，凝視住區嘉桐嘅動作。
「我一定要接到呢球。」我幫自己打氣。
區嘉桐一起手，不消半秒，排球已經飛越球網，直達我方區域，球速來勢洶洶，我預判好皮球路線，移步至接球位置，眼神不敢有半點遲疑，彎腰準備應對。
「呯！！！」
得咗吖！我成功擋住區嘉桐嘅發球，而且仲借力將排球彈到半空之中，而且啱啱好停留喺我方前排扣殺嘅位置，係一次絕佳嘅得分機會。呢個時候，我只見郭家朗向住排球墜落嘅位置助跑兩步，然後雙手擺後，急停曲膝一躍而起，去到最高點時，凌空舉起左手，眼神凌厲咁對準排球，準備一記扣殺。
郭家朗喺空中嘅呢一秒，陽光照射喺佢身上，我已經分唔清楚，佢身上嘅曙光，究竟係嚟自於陽光，定係佢自身散發嘅光芒，我閉著呼吸凝視住呢一剎那，仿佛之間我覺得，好似連時間都隨之而停留咗喺呢一秒鐘。
＊＊＊＊＊＊＊＊＊＊＊＊
或者，人生最美好的時光，
只會發生在分秒之間，
但往往最困難的，
便是懂得及時去享受這一剎感覺。
以上，就係曾皓賢當年喺我校裙背面寫嘅說話。