殘酷暗戀物語【最終部曲】: 人類群星閃耀時（下集）

————終於見到底了。


再一次推開防煙門之後，已經落到嚟樓下電梯大堂，同時間有個表情呆滯嘅保安叔叔望住我，我唔敢喺大堂停留半步，我怕保安認得出我，或者隨時一開𨋢門就會見到佢衝過嚟捉返我上去。我冇奢望過會有任何人幫到我，於是我直接奪門而出，寒風隨即撲面而來，喺呢種冰冷刺骨嘅氣溫底下，我感覺到如果我停低落嚟只會更加容易失溫，所以唯一辦法就係繼續向前跑，先至可以保持體溫，但係身邊嘅途人不斷向我投射怪異嘅目光，我唯有將hoodie頂帽笠住自己頭，耷低頭繼續向前跑，避開陌生人嘅視線。

不過其實我冇可能改變到途人用咩目光去看待我，佢哋都只係轉瞬即逝咁出現喺我生命當中，何況大家只不過係冷眼旁觀咁用奇怪嘅表情望住我，根本上就冇一個人願意停留半步去了解我發生咩事，諗到呢點我索性停低落嚟，抬頭一望原來我已經喺體育館大門前面。

「好凍吖......」飢寒交逼之下，我將所有手指縮入衣袖裡面，雙手緊緊環抱住自己，盡可能將身體減少暴露喺凝結嘅空氣之中，但係當寒風吹落我大脾度嗰陣，就好似同時俾幾百支刺針穿透骨頭一樣咁痛，我怕自己真係會凍到暈底喺度，於是我唯有行入體育館避寒，跌跌撞撞咁走到去女更衣室，推開門之後，是但搵咗角落位置嘅板凳抱膝而坐，坐底咗先發覺自己發冷寒震得好緊要，同時間身體嘅痛楚亦都開始慢慢泛現......

—————好辛苦...





更衣室四下無人，我希望呢刻唔會有人推門入嚟，咁我就可以安靜咁坐喺度逃避呢個世界。

唔得吖，因為我依然可以隱約咁聽到外面傳嚟一陣又一陣嘅歡呼聲，而且啲歡呼聲開始越演越激烈，我聯想起呢啲歡呼聲應該就係校際排球決賽，於是乎我默默咁坐低聽住佢哋嘅聲音，自己一個感受住比賽嘅高低起伏，又唔知隔咗幾耐，突然間一下笛聲長響過後，熟悉嘅打氣喊聲開始此起彼落，唔通…...佢哋已經贏咗？

我慢慢行出更衣室，順住聲音來源嚟到比賽場館，隔住木門上嘅玻璃窗偷偷地望入去，我見到班男仔衝埋去圍住佢，同佢互擁、擊掌、歡呼，佢呢刻嘅笑容應該係我見過笑得最燦爛嘅一次，跟住佢捧住個獎盃，開始同觀眾席嘅同學一齊影團體大合照，然後再到球隊合照，最後仲有同其他隊友、教練、評判、同學嘅個別合照，只係見佢全程不時四圍張望，唔知佢望緊啲咩。

再隔咗一陣，冷不防突然有人推開門，我嚇到縮埋貼喺牆邊，下意識耷低頭雙手掩面避開嗰個人嘅目光，跟住開始到班同學魚貫離場，喺我身旁逐一略過，我聽到佢哋喺度回顧返頭先比賽嘅精彩片段，有啲就喺度討論今晚平安夜要去邊度玩，即使我只係喺佢哋觸手可及嘅距離，但都冇人理會我嘅存在。

正當我諗住轉身離開人群嘅時候，我聽到一把熟悉嘅聲音喺我耳邊出現。





「王樂兒？你好啊～原來你今日有嚟到睇比賽...咦？你對鞋呢？做咩咁可愛著住毛毛鞋過嚟嘅？」係陳柏希認得出我。

「我...」我唔知可以點同佢解釋——其實我冇嚟到睇比賽，我一直留咗喺屋企溫書，直至叔叔逼我幫佢，我嘗試反抗，跟住佢打我，我再還手，然後離家出走，跑到嚟體育館匿咗喺更衣室，到比賽完結我先走出嚟偷偷望佢響度做緊咩，連自己幾時跌咗隻毛毛鞋都唔知道。

忽然間我面前出現咗一個高大嘅身影，將一對拖鞋輕輕放咗喺我面前，再踎底身幫我換走咗隻毛毛拖鞋，但對拖鞋明顯大過我著開嘅好幾個碼。然後呢個身影又喺背囊度摷咗一件長袖嘅校隊風褸出嚟，披喺我膊頭上面，成個過程一氣呵成之下完成。

「喂！你哋睇吓郭家朗隔離個女仔做緊咩？」

「嗰個女仔咁似王樂兒嘅？」





「喔！咪啫係隔離班匿喺學校陪仔過夜嗰條女？」

「啊…？但係你睇佢個嘴係咪流緊血？」

我冇講錯吖，我都話我嚟到就會聽到啲同學喺度講我咩咩咩，就係呢個時候佢好溫柔咁拖住我隻右手，轉身面向住班同學，將我擋喺佢背脊後面。

「收嗲喇你哋！你知道人哋遇過啲咩唔開心嘅事所以先要匿喺學校咩，你班友好心就唔好喺度自以為是，知得嗰少少就隨便惡意批評人，知唔知道咁樣對一個女仔造成幾大傷害！？」

「如果再有人想喺佢背後講佢壞話嘅，你直接過嚟搵我講。因為佢係我郭家朗嘅女朋友！」當佢講到女朋友呢三字嘅時候，明顯咁提高埋聲量。

「講完！」

我感覺到，頭先議論紛紛嘅聲音已經被郭家朗嘅氣場震懾到無影無蹤，有啲同學欲言又止，而有啲同學已經開始面有悔意，有啲用關心嘅眼神望住我，有啲只係頭耷耷咁轉身離開。





呢個時候，我顎高頭斜望住呢個拖實我隻手嘅男仔，佢回身望住我對眼，用埋隻左手拖住我剩低嗰隻手，我而家終於可以好清楚咁望到佢個樣，就好似一顆喺人群中閃耀緊嘅恆星一樣咁璀璨。