殘酷暗戀物語【最終部曲】: 年輕的茶餐廳老闆娘
｛年輕的茶餐廳老闆娘—My Little Airport｝
我唔想俾佢知道我尋晚冇返過屋企，要是但諗樣嘢避開呢個話題至得。
「咁你掛住同隔離個女仔傾偈，都唔會得閒搵我啦。」我故意加多下扁嘴表情刺激吓佢，我要快啲搶返個主導權過嚟。
「最衰都係班主任今個學期又分開咗我哋，唔俾我哋坐埋一齊，搞到我冇得同你傾偈。」其實佢係一路講一路㩒緊手機唔知睇緊啲咩，佢份人就係咁，漫不經心咁講埋晒啲花言巧語，但就從來冇諗過講者無意，聽者有意。
算喇，我都係搶唔到個主導權㗎喇。
距離學校冇幾遠，有一間舊式茶餐廳，係我哋呢兩年成日嚟食嘅，但係因為我哋遲咗出嚟，所以餐廳門口已經有好幾個同學排緊隊，我哋問咗老闆娘拎張咗飛之後，就企喺門口等。
我覺得，企喺度感受一下秋天嘅氣息都幾好吖，但係突然之間有陣涼風吹埋嚟，我忍唔住打咗吓乞嗤，佢即刻除咗佢件風褸，披喺我膊頭度，佢仲話：「貪靚唔著衫啊嗱。」佢講得啱嘅，學校件風褸真係有啲醜，我唔太鐘意著，但就係佢呢啲輕描淡寫嘅舉動，搞到我成日亂咁諗嘢。
片刻間，老闆娘大嗌：「２６！搭枱坐！」，終於到我哋喇，老闆娘帶我哋行到餐廳最入嗰格卡位，「好，靚女你哋坐嚟度！」我禮貌咁講聲：「唔該老闆娘。」只係見老闆娘好瀟灑咁轉身拎住兩份餐具過嚟。
但係我一坐低，就即刻想彈返起身，痴線！！點解咁㗎！？我前面搭枱坐嗰兩個原來係陳柏希…同郭家朗！而家張枱四個人入面，得我隔離嗰個唔識陳柏希同郭家朗，但係我冇得扮唔識佢哋。
呢個時候，坐喺我斜對面嘅陳柏希再次用佢把暖男聲音同我打招呼：「王樂兒，你好啊～」，但坐正我對面嘅郭家朗剩係淡淡然咁同我揮手，就繼續低頭食佢碟忌廉蘑菇意粉。做咩喎，咁冷淡㗎！
跟住到我隔離嗰個出聲：「咦？原來你哋識㗎？」
陳柏希依然都係暖男聲線：「你好啊，我哋都係排球校隊嘅，你係咪就係傳說中王樂兒個best friend—曾皓賢？」
「係啊，乜原來你哋都鐘意嚟呢間食㗎？」曾皓賢回道。
佢同陳柏希明明只係第一次面對面傾偈，就已經你一句我一句咁好似識咗好多年嘅老朋友，而我呢，居然俾郭家朗兜口兜面見到我同另一個男仔一齊食晏，已經尷尬到好想即刻搵個窿捐落去。
我全身僵硬咁坐喺度，同時間個肚開始餓到有啲辛苦，始終尋晚唔係食咗好多嘢，今朝更加冇食到早餐，我顎高頭望吓牆邊啲毛筆字餐牌，想俾個暗示曾皓賢佢快啲結束對話揀嘢食。
郭家朗見我望住牆上面嘅餐牌，就喺枱面玻璃板下拎咗張餐牌出嚟遞俾我：「你睇吓你想食咩？」其實我唔使揀食咩㗎，因為我每次都係嗌嗰樣嘢，但我都好禮貌咁向佢點頭講聲：「唔該～」，而我旁邊嘅曾皓賢終於肯停底揀食咩。
「老闆娘！一份A餐，同一份忌廉蘑菇意粉，熱奶茶同熱檸水，唔該！」曾皓賢係唯一一個知道我鐘意食咩嘅男仔，每次都會幫我嗌埋，平時嚟講當然係好體貼，但今次你問都唔問吓我就幫我嗌埋，連嘢飲都嗌埋，咪啫係完全表露無遺咁俾郭家朗知道，我同你嘅關係有幾親近。救命啊 ._. 我捐落枱底都可以㗎…
「WOW，王樂兒原來你都鐘意食忌廉蘑菇意粉，你同家朗好夾啊。」陳柏希係在座唯一一個可以繼續延續話題嘅人，但請問而家係咪鞭緊我屍？冇所謂喇，反正我都冇晒知覺了。
「妖，咪嘈喇！」郭家朗喝住陳柏希唔俾佢繼續講落去，唉好彩仲有你幫手解圍咋。
郭家朗跟手仲拎起張單，向坐喺外面嘅陳柏希推咗一下手肘，霸氣咁講咗句：「食完喇，去埋單。」陳柏希呆咗一呆，而大家都見到郭家朗碟意粉明明仲剩一半未食完，然後郭家朗又補多句：「我今日唔記得拎波衫，你陪我返去攞。」
陳柏希依依不捨咁抹嘴準備離開，但臨走之前向我點點頭，不過又係嗰種禮貌又帶點恭敬嘅態度，好似多謝我提供咗半餐飯嘅花生俾佢食，但係郭家朗就冇同我講掰掰，我諗咁樣都係好事嚟嘅？至少唔會俾人估到我同佢嘅關係？
就係咁，我又變返同曾皓賢兩個人食晏，我哋食完差唔多行到返學校大門嗰陣，佢失驚無神咁同我講咗句：「嗰個排球隊隊長應該鐘意你。」我聽完即刻耍手擰頭咁講：「冇可能喇，佢實有好多女埋身點會鐘意我。」
明明人哋尋晚先向我表完白，而明明我又唔係郭家朗本人，但我都係好本能反應咁幫佢辯解。
不過調返轉頭諗吖，起碼人哋有直接同我表白，唔似得你。 三點鐘放學之後，我執好書包就即刻返屋企攞排球隊波衫，諗住順便沖埋涼，因為我由尋日朝早到而家都冇沖過涼，雖然冇咩點出汗但起碼可以換咗條底底先。仲有成晚冇返屋企，又冇打到電話俾媽咪，唔知佢有冇擔心我，但我記得叔叔今日係返日更，所以佢應該冇咁早喺屋企。
當我返到屋企之後，成間屋都冇著燈，應該真係冇人喺度，我急急腳拎部電話入房叉住電先，再喺衣櫃執好套波衫出嚟，然後除低條校裙同個bra喺張床度，揀咗條乾淨嘅底底就行去浴室，途中我望到叔叔間房度門只係虛掩冇鎖實，但係因為訓練喺半個鐘之後就開始，我再唔快啲就會遲到，所以都唔理得咁多，我閂埋浴室門，拉好浴簾，較啱熱水就開始沖涼。