殘酷暗戀物語【最終部曲】: 假使世界原來不像你預期
｛假使世界原來不像你預期—方皓玟｝
我糾結緊洗唔洗埋頭好，我怕洗完頭又要吹頭就會趕唔切返學校練波，但諗諗下都係想洗埋頭紥返好啲頭髮，因為一陣可能會見到佢，唔想俾佢見到我打扮得太求其。
為咗要吹乾啲頭髮，咁就只好犧牲沖涼嘅時間，不過唔緊要喇，反正練完波返到屋企都要再沖過，所以拿拿臨沖完之後由頭到腳抹乾個身，著返好條底底，再用條浴巾包住個身，就行返返睡房喇。
返到睡房，我除咗條浴巾，想搵返頭先放喺床上面個bra嘅時候，發現佢唔知去咗邊，摷咗張床一陣都搵唔到佢。咁算喇，我都係吹住頭先，反正啲嘢要搵嘅時候總係搵唔到，唔搵嘅時候佢就會出返嚟。
我喺衣櫃是但搵咗個bra戴好之後，然後就將個風筒插蘇頭插喺近房門嘅位置，撻著個風筒，啲「呼呼」聲浪瞬間填滿成間睡房，我面對住張床，背對住房門，企喺度一束一束頭髮咁慢慢吹。
我一路吹頭，一路諗返起尋晚喺儲物室同佢經歷嘅事，越諗越覺得好唔現實，似係發咗場夢多啲，究竟而家我同佢之間，算唔算係男女朋友嘅關係呢？
正當此時，我意識到有人突然出現喺我後面，從後環臂攬住我個胸，一下子將我推到去床邊，呢下衝擊連個風筒插蘇頭都鬆開咗，我嚇到成個風筒跌咗落地，然後我成個人俾佢㩒住咗喺床度，感覺到有條嘢隔住我條底褲開始喺我屁股之間磨蹭。
呢一刻，我好後悔，點解冇望清楚佢係咪真係唔喺屋企，我怪自己太過大意，唔記得鎖好門就剩係著個住bra同底褲喺睡房吹頭。我用盡全身氣力去反抗，但因為佢從後將我推落床上面，居高臨下地用佢身體嘅重量將我牢牢壓實，我同佢之間嘅體力差異太大，我完全動彈不得，只能夠趴喺床上面，任由佢喺我後面，對我為所欲為…
無幾耐，我開始感覺到下體有股好強烈嘅撕裂痛楚，我出盡力抓實張床單，嘗試去抵消呢種劇痛，但係根本上就一啲作用都冇。我望住枱面叉緊電嘅手機，好想，好想伸到隻手去攞，打電話俾佢求救，但係部電話呢刻同我嘅距離，就好似地球同仙女座嘅距離，遙遠到根本冇可能觸摸到。
而家嘅我，
只係希望，
自己可以快啲痛到暈低，
冇晒知覺，咁咪可以擺脫一切？
當靈魂抽離肉體之後，
係咪就可以超越被污辱嘅痛楚？
但係我仲感覺到，自己個身體不由自主咁前後晃動，
搖晃嘅頻率，開始越嚟越快，
眼眶上嘅淚珠，令到我嘅視線變得越嚟越模糊，
仲有幾時先完…
…
終於，去到最激烈嘅一剎那。
靈魂就喺呢一刻，成功飄離肉體。
隨之而來，好似一切又回復靜止狀態。
完了吧？
……
我拖住自己殘破嘅軀殼，用我僅餘嘅力氣爬到床頭，拎起部電話睇吓而家幾點鐘。
—3:32 PM—
唉，排球隊訓練已經開始緊，我躊躇緊仲應唔應該返去練波好，但係我而家攰到連拎住部電話都覺得好重，部電話就咁從我手上摔咗落個枕頭上面，我縮埋一舊咁匿埋喺張綿被入面，雖然黑擝擝咩都睇唔到，但係我都已經冇氣力去聚焦自己嘅視線。
不過我依然可以感覺到，仲有啲噁心嘅黏液殘留喺我大腿內側，我記得上年暑假，發生咗第一次之後，嗰下我即刻衝咗入浴室鎖實度門，將花灑扭到最大，沖咗好耐好耐好耐，都係沖唔走嗰種核突到極點嘅感覺。
我望住手機個時鐘，一分鐘又一分鐘咁過去，就算而家著返衫返去學校，最多都係剩返半個鐘時間，返到去又要扮返一個正常女仔。況且，我呢啲球技掹車邊嘅人，即使俾我入到校隊，其實個位置都係可有可無㗎啫，就算我唔出現，應該都冇人為意到㗎啦。
只係喺呢個時候，我又好想某個人會注意到我，發現到我原來冇返到學校出席訓練，唔知佢呢刻諗緊咩呢，下個月就係校際比賽，如無意外就係佢嘅最後一次，所以佢哋成班而家肯定好專注咁練緊波。
諗到呢度，我索性將個手機螢幕熄咗去，攝入枕頭下面，外面嘅世界係點，我已經冇力氣去知，亦都唔關我事。撕裂嘅陣痛開始慢慢緩和，而內心嘅痛楚又慢慢泛現，其實我都只係想做一個正常嘅女仔啫，想有人錫，俾人保護，但係而家我唯一能夠做到嘅，係將自己縮埋一嚿，匿喺張被裡面。
直到永遠。
直到我個枕頭開始係度震，但係我意識已經進入緊朦朧狀態，究竟係啲咩係度震，而且好似越震越頻密。
「咩嘢係度震？」我俾佢震到有啲唔耐煩，咦呢種震動，咁似平時電話喺裙袋響嗰陣咁嘅？
我猛然醒起原來真係我部手機係度響緊，我即刻喺枕頭底摷返佢出嚟，見到有三個未接來電，全部都係郭家朗打過嚟。下一秒鐘，電話又再響起，來電顯示：「郭家朗」
「你個傻妹做咩唔聽電話！！係咪想擔心死我！？做咩唔見你返嚟學校練波嘅！？」一嚟電話嘅另一邊就好激動咁問我。
「對唔住吖......」我唔知俾咩野反應好，同時又察覺到我開始控制唔到自己淚腺，而且我要壓低聲線，我驚會俾隔離房知道我講緊電話。
「擔心死人喇！！你冇事啊嘛？係咪唔舒服定係太攰？」而我亦都完全冇心理準備真係會有人關心我。
「唔係吖，你唔使練波咩，你專心練波先喇，唔使理我...」所以我好傻咁，選擇推搪咗佢嘅好意。
「傻妹而家過咗五點喇！我就係頭先練波唔見你，跟住一完咗我即刻跑去女子隊嗰邊，問佢哋知唔知你去咗邊，佢哋一個二個都話你今日冇嚟練波又冇請假，我驚你出咗事，所以就即刻打俾你，結果打咗俾你四次你先聽，知唔知我真係好擔心你？」郭家朗好激動咁一口氣講咗一大段說話。
佢因為我，而專登走去搵班女仔問我去咗邊，咁大家就會猜疑我同佢嘅關係，但係唔知點解，我非但冇諗住怪責佢，反而仲覺得好窩心、好感動，雙眼早已經珠淚盈眶，身體不住抽搐啜泣。
「傻瓜，你想喊就即管喊喇，唔使忍住，我會喺度陪住你。」佢用好溫柔嘅語氣去安慰我。我諗，或者佢已經估到我又遇到咩事。
假使世界從不像我預期，但呢刻始終有一個人冇放棄到我。恍然間，眼淚好似決堤洪水一樣，再也控制不住。