殘酷暗戀物語【最終部曲】: 那裡只得我共你
｛那裡只得我共你—Dear Jane｝
「你可唔可以應承我，尋晚喺呢間房發生嘅所有嘢，剩係可以你一個人知，唔可以有其他人知。」
喺走出呢度門之前，我想聽到佢再應承多我一次…
＊＊＊＊＊＊＊＊＊＊＊＊
「喂～你諗咩諗到咁入神啊？」突然之間覺得左手手臂俾人搣咗一下。
「啊，好痛啊。」我下意識即刻縮開隻手，回一回神先知道原來係坐我隔離個女仔偷襲我。
「冇嘢吖，我發吓吽哣咋嘛。」頭先上中文堂嗰陣已經勁眼瞓完全專心唔到，就算而家放小息都攰到成個人唔想郁，膊頭痠軟得好緊要，我忍唔住又伸隻右手去捏兩下。
「尋晚瞓得唔好？」隔離個女仔再問我。
「係吖。」我索性趴喺張枱恰多一陣，我當然唔敢講其實尋晚我喺學校嘅排球隊儲物室過咗成晚，只係塾高咗個書包當枕頭，就喺冰冷嘅地板上面瞓著咗，而間儲物室仲要唔係淨係得我一個人，而係排球隊男子隊嘅隊長郭家朗都喺度。
對於尋晚發生嘅事，我越同自己講唔好去諗，就反而越諗得仔細，明明我對佢嘅嘢所知無多，淨係知道佢係留級生同埋排球隊隊長，但點解我同佢之間嘅關係會一下子發展得咁快。
「唉～」諗到呢度我情不自禁長嘆一聲，越諗就越更加恰唔着，呢一刻好想搵個人傾訴，俾啲指引我，但係都唔知搵邊個好，隔離枱個女仔我又同佢唔係咁熟，更加冇可能走去問「佢」呢啲嘢。
我望住枱面上面用鉛芯筆畫嘅城堡，緩緩擰轉頭望去班房最遠角落嘅「佢」，見佢同隔離個女仔唔知又係度傾緊啲咩嘢，我就知道唔使旨意去搵佢傾心事。
「唉～」我又長嘆一聲，人生好難啊。忽然間聽到學校大鐘響起，小息完結，下堂係我最鐘意同成績最好嘅M2數學。我同自己講，都好啊，起碼可以專心做數，唔好俾自己再響度胡思亂想。
教數學嘅周sir，算係我哋學校數一數二靚仔嘅老師，所以我上堂都上得特別專心，成績就自然又好啲。但係唔知係咪今日太攰，今堂數學堂我完全冇心機聽書，望住喺黑板寫數學題嘅周sir，雖然平時覺得佢幾靚仔，但今日好似都只係，普普通通啫。
突然間，坐我後面個男仔輕輕拍咗我一下膊頭，我趁周sir仲寫緊黑板嘅時候，即刻擰轉身望下做咩事，個男仔就遞咗張紙仔俾我，我喺枱底櫃桶打開張紙仔，見到啲字跡四四方方咁好整齊，我就知道係邊個寫俾我，上面寫住：「做咩今日神不守舍咁，一陣LUNCH？」
我擰轉頭望過去課室最遠角落個方向，見到佢都望緊我，我同佢輕輕點咗一下頭，示意即係應承佢一齊食晏，不過見佢又側一側頭咁望住我，個意思好似係度問我做咩今日我個樣咁呆滯，我擰擰頭，覆返佢我冇事。
我哋呢種隔空表情溝通，經過呢兩年嘅磨合，已經建立咗好好嘅默契，基本上一個簡單嘅表情，我哋互相之間都可以領會到對方想講啲咩。只不過，有啲事佢始終都唔會估得到，如果我選擇唔講出嚟。
呼，今日真係好辛苦，終於俾我捱到午飯鐘聲響起。我將枱面啲筆記文具塞晒入櫃桶，再喺書包拎咗個銀包袋落裙袋，就行出班房去走廊樓梯口等佢，但係等咗幾分鐘都未見人，不過我都習慣佢成日遲到㗎喇，只係唔知佢今次去咗廁所梳頭定洗面，總之次次約親佢，佢都係姿姿整整完一輪先會出現。
就係呢個時候，我見到遠處有個兩個男仔喺隔離班行出咗嚟，其中一個高大幾靚仔嘅就係郭家朗。死喇！我唔知點解唔想俾佢見到我一個人企喺度啊，更加唔想俾佢見到我約咗另一個男仔食飯。佢仲要同佢個朋友向住我呢個方向行緊過嚟，我即係擰轉身面向牆，希望借住其他同學落樓梯嘅人潮，掩蓋到我嘅身影。
過咗幾秒，我斜眼望到佢越行越近，我差啲想將自己塊臉貼埋落封牆度，點知突然間聽到有把暖男嘅聲音喺我後面叫我：「王樂兒，你好啊～」
嘩～～～咩事啊邊個搵我啊 ＞.＜”””
既然俾人發現咗，我都只可以禮貌咁回身同佢打返個招呼，原來同郭家朗並肩而行嘅，係另一個排球隊男隊員，我初中同過佢同班所以認得佢係陳柏希。佢滿臉笑容但係又抱有恭敬咁望住我，但我完全唔敢同佢隔離嗰個郭家朗對望，唔知佢而家係咩嘢表情。只係聽到郭家朗用一把好溫柔嘅聲問我：「約咗人食飯？」
我全程耷低頭，直頭感覺到對耳仔都開始紅緊，唯一俾到嘅反應只係好有禮貌咁覆返佢：「係吖，唔好意思。」痴線！王樂兒你做咩同人講唔好意思，唔好意思你個頭，人哋又唔係約你食飯。正當我心亂如麻嗰陣，就聽到郭家朗講：「咁下次先喇，放咗學排球場見。」
吓？下次？
我心念一轉，突然間好想問佢係咪真係有遵守承諾，冇同其他人提起尋晚嘅事，但差唔多開口問嗰刻我又即係收返，我都唔知自己做咩要懷疑佢，明明係我認真考慮過佢值得信任，我先會同佢講我嘅秘密，咁點解而家個心又要係度囉囉攣。
佢見我好似有啲神不守舍，問咗我一句：「你冇事呀嘛？」
我即刻擰擰頭講：「冇事吖。」
佢同我揮揮手道別：「一陣見。」
我點點頭回覆：「一陣見。」
跟住佢同陳柏希就轉身向住樓梯方向落去，只係依稀聽到佢哋傾緊今日放學排球隊訓練嘅事。係喎，差啲唔記得今日有特別訓練，但我尋晚冇返到屋企冇帶到套運動衫出嚟，一陣放咗學要返屋企拎先得。
忽然間，我感覺到膊頭俾人從後拍咗一下。
「嘩，嚇死我。」雖然我知道係「佢」，但係依然俾佢嚇咗一跳，只見佢頭髮仲有少少濕濕地未完全乾晒，就即係話佢係頭先係男廁梳緊頭。
「你做咩尋晚到今朝都唔覆我message啊？」落樓梯嗰陣佢問我。
「因為我電話冇電吖。」唔係我唔想覆吖，但係因為尋晚我喺排球隊儲物室過咗成晚，電話一早就冇晒電。
「吓，你返到屋企冇叉電咩？」佢再追問我嘅話，我就招架唔到㗎喇。
「我……」死喇，點解釋好… 我咬住嘴唇不停咁諗，究竟我應該坦白同佢講，定係呃佢好。