我無啦啦同隻芝娃娃交換咗身體，跟住無啦啦又遇上喪屍大爆發: （64）

我地三個行出門睇吓咩事，同時間油頭仔趕到：「波士大…點…點解波士你塊面…腫成咁嘅嘅？你俾人打呀？」

「無事無事，係我唔小心仆親啫。你快啲講發生咩事？點解咁嘈嘅？」

「今次大獲，情報室俾人爆格！」

「爆格？」

「係呀！你過嚟睇吓就知咩事架啦！」





油頭仔隨即帶我地行到去基地嘅一間房。

門外鋼製嘅大門被炸開，房間之內擺放咗三部電腦，以及一堆被摷亂嘅文件。

六、七個著住制服嘅人員正喺裡面點算損失。

好快其中一個人行埋嚟話：「報告波士，我地有部衛星電話唔見咗！」

「衛星電話？」我其實未係好明發生緊咩事。





「竟然係偷衛星電話？唔通有人想報串？」油頭仔就話。

「究竟發生咩事？可唔可以解釋一吓？」我問佢。

「波士，我地海底基地係同外界完全隔絕，除咗情報室嘅電腦同衛星電話之外，我地全部人包括你同我，都係無辦法同外界通訊。」

「咁即係點？」我再追問。

「即係有人想偷偷地同外界聯絡。」對方回答。





「但係點解佢要咁做？」

「直覺話俾我聽，基地入面有二五仔！」油頭仔拿拿臨叫人翻查閉路電視，誓要搵出係邊條友搞事。

「其實頭先我已經想問架啦，呢度其實邊度嚟？家陣又係發生緊咩事？」阿明哄個頭埋嚟，細細聲喺我耳邊問。

我細細聲答返佢：「總之就一言難盡，一匹布咁長。」

「波士！呢度交俾我！我一定幫你查明邊個係二五仔!」油頭仔對我講。

「咁就麻煩曬你啦，我返去會議室先，等你好消息。」

接下來，我就同阿明、Irene返去會議室。

閂埋門之後，我就將我知道嘅嘢講曬出嚟。





最主要都係關於Irene老豆散播喪屍病毒，企圖高價賣出特效藥嘅事。

「Irene個老豆竟然做出啲咁嘅事？」阿明十分詫異。

「唔怪得條友無啦啦想送我去離島咁遠！」Irene行去再揭開個蓋，夾起碟上嘅八爪魚。

我就回應話：「佢提前想送你走，都算係顧及你嘅安危嘅。」

「錯啦！嗰日我唔覺意偷聽到佢講電話，仲俾佢發現，之後條仆街就急急腳話要送我走。我記得當時佢講『每個地方都要有』，我嗰陣聽唔明，依家我諗我明啦！」

Irene講完呢段說話，然後就對面前嘅八爪魚講：「你做咁多壞事，依家變成八爪魚，總算係得到應得嘅報應。」

隻八爪魚無乜反應，似乎係離開水太耐，開始缺氧。





Irene擘大口，想一啖吞佢老豆落肚，我立即上前阻止：「唔好呀喂！」

「有咩唔好？」

「一嚟有啲核突，二嚟我家陣上咗你老豆身，即係佢做過嘅全部衰嘢，變成由我頂曬！」我同佢解釋。

「咁你想點？」

「梗係留住佢條命先啦，無理由要我幫佢食死貓。」我望一望隻八爪魚，佢個樣死咕咕，要快啲搵魚缸養住佢先得。

我將八爪魚放返上碟，行出會議室，想搵人幫幫手。

咁啱油頭仔又嚟搵我：「報告波士！我地好快咁翻查過一次閉路電視記錄，發現情報室外嘅CCTV俾人做過手腳，所以影唔到係邊條友爆格。」

對方呢番說話啱講完，基地又再響起警報：「Wee—Wee—」





再下一秒，更傳嚟巨大嘅爆炸聲：「Boom！！！」