我無啦啦同隻芝娃娃交換咗身體，跟住無啦啦又遇上喪屍大爆發: （65）

「Wee—Wee—」警報聲一直響。

我同油頭仔搲曬頭，都仲未知發生咩事。

隔咗好一陣，先有人慌忙咁前嚟匯報：「波士弊…弊啦！」

我第一句就問：「發生咩事？頭先嗰吓係咪爆炸聲？」

「係呀波士，有班人攻擊我地基地，兼炸開咗道門，硬闖咗入嚟！」





「嗰班係咩人嚟架！」油頭仔追問。

「唔…唔清楚…」

就喺呢個時候，走廊上傳出急促而密集嘅腳步聲。

擰轉面一望，有一隊著住整齊裝備嘅持槍人士，向住我地正面行嚟。

帶頭而又企中間嘅係一個白人鬼佬。





呢個人我認得。

之前我同Irene、阿明經電話接收到緊急警示，其中有段片就係影住呢個鬼佬發言。

喺嗰段片入面，呢個鬼佬話聯合國正著手解決香港嘅喪屍危機。

咁即係代表眼前呢班人係聯合國部隊？

佢地嚟呢度做咩？





仆街！唔通係發現咗個韓國佬嘅陰謀？

對面一字排開，舉起槍指住我地，因此我地唔敢輕舉妄動。

隨後，個聯合國鬼佬帶住班𡃁步步緊逼，一路逼我地退後。

我托住隻裝住八爪魚嘅碟，同油頭仔佢地一路後退，慢慢退到返會議室。

阿明同Irene喺會議室，見到有班人揸住槍行入嚟，都嚇咗一跳。

佢地立即彈開，企埋墻唔敢亂郁。

「呢班又係咩人嚟架？？」阿明一邊向我打眼色，一邊問我。

俾七八支槍指住，我依家連抖啖氣唔敢太大啖，莫講話開口講嘢。





「I'm Chris。」個聯合國鬼佬先自我介紹。喺佢隔籬有一個翻譯人員，全程為佢翻譯。

對方隨即再表明自己嘅身份同來意：「我係聯合國部隊嘅司令，我嚟呢度嘅目的係要逮捕你。」

呢句說話佢係望住我講，咁好明顯佢口中「你」就係指我。

「金元彬，我地查到你係今次喪屍危機嘅主謀！你散播喪屍病毒，危害大眾，企圖以高價賣出特效藥，從而謀取暴利！所以我地要拉你返去！」

果然無估錯！個韓國佬嘅陰謀真係敗露咗！

只但係，個韓國佬還韓國佬，我還我，佢做過幾衰嘢根本唔關我事！

於是我即刻為自己辯護：「拿！成件事唔關我事！可能講出嚟你地都唔信，其實我…」





「唔好諗住狡辯啦，我地搵到證據，證明到你就係主謀！」