我無啦啦同隻芝娃娃交換咗身體，跟住無啦啦又遇上喪屍大爆發: （63）

Irene拳拳到肉，打到我一仆一碌。

我目前嘅身體係一個五十幾歲嘅阿叔，面對住對方一個肌肉橫生嘅大隻佬，我根本無任何招架之力。

被人打到趴街嘅我雙手護頭，忍住痛大聲表明身份：「係我呀！我同你地喺碼頭上船，之後隻船爆炸，大家一齊跌咗落海！」

Irene半句都聽唔入耳，只管拳打腳踢。

好在阿明有留心聽我講嘢，立即叫Irene停手。





「做咩呀你，無啦啦喺度阻住曬。」

「佢話架船爆炸，我地一齊跌落海，唔通…」

「係呀！係我呀！我手腳被炸到斷曬，成個人跌咗落海，喺就嚟死嗰陣，俾隻八爪魚咬咗，然後我同八爪魚交換咗身體，後尾被捉到嚟呢個地方，最後俾個韓國佬咬咗啖，就變咗我依家呢個身體。」

我一輪嘴同佢地解釋成件事嘅來龍去脈。

而我講得咁清楚，Irene依然有啲半信半疑，質問我：「你跌落海之前係咩人？我地同你做過啲咩？」





「對上我上咗一個南亞仔嘅身，我同你地喺柴灣福利會匿咗一個禮拜，之後逃走咗出嚟，中途阿明俾喪屍咬到睪丸，我負責扶住佢，你就用斧頭切佢粒嘢落嚟。」

我將大家一齊經歷過嘅嘢，基本上都講曬出嚟，佢地都無得唔相信。

「Irene，睇嚟真係佢上咗你老豆身。」阿明同Irene講。

「乜同我交換咗身體嘅呢個男人，係你老豆？」我問Irene。

「係！所以你依家個樣好乞我憎！」





老實講，我寧願俾佢討厭，都好過佢鍾意我。

跟住Irene又問：「咁我真正嘅仆街老豆依家喺邊？」

我指向長檯上被冚住嘅嗰隻碟：「喺嗰度。」

Irene行去揭起個蓋，用筷子夾起隻八爪魚：「老豆！乜你變咗八爪魚咁陰功？」

個韓國佬上咗隻八爪魚身，好似仲未知發生咩事。

佢講咗一大堆韓文，Irene又用返韓文答佢。

佢地一人一句，聽落好似喺度對鬧。

我同阿明聽唔明韓文，唔知佢地喺度講乜。





然而喺剛才被毆打一刻，我諗返起藍色制服上嘅logo喺邊度見過。

我唔明嘅係，點解一間賣潛水用品嘅公司，會喺海底有個基地？

莫非賣潛水用品只係掩飾，實質佢係一間製造同散播病毒嘅黑心公司？

咁嗰個鬼佬出現喺呢度，係咪即係代表呢壇嘢佢都有份？

我個腦一吓子出現好多疑問。

「Wee—Wee—」霎時間，成個基地無端端響起警報。

我心諗今次又搞邊科？