我無啦啦同隻芝娃娃交換咗身體，跟住無啦啦又遇上喪屍大爆發: （62）

「報告波士，我地喺附近海域，撈到呢兩個來歷不明嘅男人，請問點處置？」其中一個蛙人問我。

「咁都仲使問，梗係直接掉返佢地落海啦，你當我地呢度係避難所！波士，我講得啱唔啱呀？」油頭仔問我。

我無出聲，望住嗰兩個昏迷嘅男人，一個上半身著恤衫、下半身無著褲，另一個就肌肉爆棚。

我一眼就認出係阿明同Irene，然後話：「咪住！呢兩個人我識架，你地快啲抬去入會議室救醒佢地！」

「係囉！聽唔聽到呀！快啲孭呢兩個男人入去！」油頭仔即刻執我口水尾。





佢呢種人十足十平時喺老細身邊跟出跟入嘅世界仔。

喺公司我最憎呢種人，不過家吓做咗人地波士，反而覺得幾爽。

喺暗爽嘅同時，我再回頭一望，發現嗰個鬼佬居然偷偷地走咗。

不過我諗佢應該都唔會離開水底基地，呢刻都係先關心阿明同Irene嘅情況。

兩個蛙人分別幫昏迷嘅二人進行心外壓急救。





當時架船大爆炸，我同佢兩個都被炸飛跌落海。

眼見佢地身上無炸傷嘅傷痕，估計應該只係浸親。

經過約莫兩分鐘嘅搶救，阿明同Irene卒之醒返。

佢地全身濕曬，我叫油頭仔快啲拎兩件風摟，俾佢地笠住保暖。

阿明同Irene第一眼見到我，神情有少少錯愕。





家吓我變咗韓國佬，相信佢地都唔知我係邊個。

然而我又唔想喺咁多人面前表露身份，因此就叫油頭仔以及其他人離開會議室。

我身為佢地嘅波士，無論我講乜佢地都會照做。

好快全部人就返出去，剩返我同阿明、Irene三個。

「Irene…呢個人係唔係…」阿明仔細咁打量我。

「嗯？乜你地咁都認到我？」我以為我唔使講，佢地已經認得出我。

「對咗你咁多年，梗係認得啦！」Irene失驚無神，一拳盅埋嚟我塊面度，當堂打到我訓低。

「你無啦啦做咩打我？我係…」






我都未有機會表明身份，對方又狠狠咁踢我一腳，直頭當正我係仇人咁款。

我個肚被踢咗一腳，痛到我講唔到嘢。

「老豆，我知你唔認得我架啦，不過我就認得你！」

吓？我唔係聽錯呀嘛？Irene佢叫我做老豆？

「我依家終於如願如償變成男人！」Irene雙手揸住衫領稱起我，「點呀？你係咪唔認得我？」

個肚仲劇痛緊， 我依然講唔到嘢。

「你唔認得我唔緊要，反正我淨係想打你一獲出返啖氣！」Irene捉住我隻手，用力向後拗。





我痛到跪咗喺度，眼水都標埋。

呢刻Irene身上笠住件藍色風摟，跪喺地下嘅我咁啱雙眼對住件衫上面嘅logo。

忽然間，我諗起自己喺邊度見過呢個logo！

呢個咪就係隔籬公司個招牌logo？

我相信大家應該已經唔記得，喺故事好早期我曾提及過，我女神俾隔籬公司個鬼佬溝左。

除此之外，我亦提及過隔籬公司係賣潛水用品。

而嗰間公司嘅招牌logo，就係水底基地入面藍色制服上嘅logo？！