我無啦啦同隻芝娃娃交換咗身體，跟住無啦啦又遇上喪屍大爆發: （34）

「咩話？你講多次？」我懷疑自己聽錯。

Irene回答我話：「雖然我一出生係女人，只但係一直以嚟，我對自己嘅性別認知卻係男人。其實早就喺16歲嗰陣，我就下定決心成年之後變性！」

「吓？」我心諗咩料呀喂。

「如果唔係我個仆街老豆阻止我，我諗我早就變咗性做男人！」

Irene提到佢老豆嗰時，個樣好憤恨。





之後佢繼續講：「不過依家好啦！唔使變性都俾我做到男人，仲要係肌肉大隻佬！簡直爽到爆！」

「所...所以你唔打算變返做女人？」我問。

「無錯！大波妹就留俾你做啦！」

「唔係掛？你諗清楚架啦？」我追問對方。

「我諗得好清楚，因為我已經諗咗好多年，我就係要做男人！」





Irene態度十分堅決，然後佢又擰轉面同恤衫男阿明講：「家陣我變成男人，咁你以後就唔好再鍾意我，你要鍾意就鍾意佢啦。」

Irene口中嘅「佢」指嘅就係我。

阿明眼甘甘望住我，再掃視我對波，跟住突然企起身，好激動咁講：

「哼！我阿明先唔係一個膚淺嘅人！我鍾意Irene你，鍾意嘅係你嘅靈魂，而唔係你嘅肉體！無論你係男又好女又好，我對你嘅愛都係永恆不變！」

嘩！我諗我啱啱聽到一段十分觸動嘅對白。





「頂！我真係服咗你，咁都仲唔肯死心。」

「真愛係唔會咁容易死心架！反正我唔理你鍾唔鍾意我，總之我就係會繼續鍾意你！」阿明好認真咁同Irene講。

我開頭仲以為佢兩個係情侶關係，不過依家睇嚟，應該只係阿明一廂情願單戀Irene。

同埋我曾有一刻思疑過，Irene會唔會係為咗要令阿明徹底死心，所以先特登唔肯變返做女人。

後來我發現唔係，事實係Irene真心想做男人。