我無啦啦同隻芝娃娃交換咗身體，跟住無啦啦又遇上喪屍大爆發: （33）

「Raughhh！」

窗口突然間有隻喪屍，一手伸埋嚟，捉住我隻手。

我嚇咗一跳，出手用力扯開嗰隻蒼白嘅喪屍手。

可惜對方捉得好實，我點扯都扯唔開，跟住又有第二第三隻手捉住我。

「我俾班喪屍捉住咗！嚟幫幫手啦喂！」我擰轉面向另外二人求救。





「等多陣，我地呢邊啲喪屍差唔多走曬，搞掂之後即刻嚟幫你！」恤衫男回應我話。

「頂！救命呀！」我搏曬老命同嗰幾隻捉住我嘅喪屍拉扯。

雙拳難敵四手，眼見自己就嚟要俾班喪屍扯出車外，好好彩喺個moment，我feel到有道氣喺個肚度谷緊出嚟。

放屁！我想放屁！

我冒住俾喪屍咬屎忽嘅風險，將個籮柚擰過去對住班喪屍。





下一秒，「呠」一聲，我放咗一個好大好響嘅屁。

「Ahhh！」啲喪屍俾個屁攻到即刻放手兼退後。

個屁放得大聲之餘仲好撚臭，唔單止係啲喪屍，就連我都幾乎俾臭到暈咁滯。

「你平時唔食菜架！啲屁咁撚臭嘅？」我問個大波妹。

「臭咪好囉，臭撚走啲仆街喪屍！」大波妹為此感到非常自豪。





我忍唔住再放多一個臭屁，嗰一浸臭過屎坑嘅味道，徹底咁遮蓋曬我地身上浸人肉嘅香味。

周圍嘅喪屍一聞到浸味，個個都走夾唔抖。

幾經波折，終於都趕走班喪屍，我地三個亦卒之可以坐低，暫時鬆一口氣。

抖順條氣之後，我地幾個就簡單咁自我介紹。

恤衫男話自己叫阿明，上咗紋身佬身嘅大波妹就叫Irene。

跟住我就向佢地一五一十咁解釋返交換身體嘅事。

「即係個紋身佬咬咗你，咁你就變成咗佢，佢就變成老鼠，之後輪到我咬你，所以我就變成你，你就變成我，係咪咁嘅意思？」Irene問我。

「係！無錯！就係咁嘅意思！變成老鼠之前，我都同過芝娃娃仲有喪屍交換過身體。」我補充話。





「哦！原來你做過喪屍，唔怪得你知喪屍會聞到人肉嘅香味，咁你本來嘅身體呢？」恤衫男問我。

「佢俾芝娃娃上咗身，之後俾架直升機救走咗。」

「乜有直升機嚟過柴灣？」恤衫男追問。

「有，機身仲印住聯合國嘅logo，我諗聯合國都嚟埋幫手解決依家嘅喪屍危機。」

我講完呢句，跟住同Irene講：「係啦，趁依家無喪屍，你快快脆咬我一啖，咁你就可以攞自己嘅身體，而我就上返紋身佬個身。」

Irene聽完我咁講，冷笑咗一聲：「哈！我先唔制！」

「吓？點解呀？」我問。





「哈哈！唔怕話你知！雖然我係女人，但其實一直以嚟我都想做男人！」