我無啦啦同隻芝娃娃交換咗身體，跟住無啦啦又遇上喪屍大爆發: （32）

架小巴俾佢地拍到又搖又震，車身玻璃就嚟裂咁滯，再咁落去我地三個棧攬住一齊死。

「點算呀點算呀！好多喪屍呀！」恤衫男騰曬雞。

「屌你冷靜啲啦！」大波妹喝佢一聲。

或者我唔應該再稱呼佢做「大波妹」，畢竟佢依家已經變咗一個佬。

我地三個人入面，最了解喪屍嘅人係我，原因係我曾經做過喪屍。





於是乎，我好努力咁回想返喪屍嘅特性，繼而希望諗到一啲應對方法。

「嘭唥！」

左邊一排車窗逐個俾班喪屍拍到裂開咗，十幾廿隻手伸咗入嚟車廂。

中文有句成語叫「急中生智」，結果喺咁危急嘅情況下，真係俾我諗到計仔！

「你地聽住！啲喪屍之所以會咬人，係因為佢地聞到人肉散發嘅嗰股香味… 」





「直接講重點啦！」大波妹好心急咁打斷我。

「假如佢地聞唔到嗰浸香味，咁可能就會走！」

「哦！咁我明你想講咩啦！」大波妹即刻get到。

「但我唔明喎。」恤衫男仲係一頭霧水。

大波妹無解釋，只係舉起恤衫男隻手，聞一聞佢胳肋底：「有無搞錯呀！男人老狗一啲汗味都無嘅！」





隨即佢舉高埋自己隻手，聞咗吓自己嘅胳肋底：「哈！呢浸味就夠掯啦！」（掯：kang3）

大波妹果然明白我嘅意思！

我心中嘅對策就係用臭味遮蓋人肉嗰浸香味，話唔定咁樣可以趕走班喪屍。

「嘭唥！」右邊一排窗亦已全部碎裂，兼有喪屍嘗試緊爬入嚟。

「事不宜遲，趁我地啲汗未乾，身上成浸汗臭，一於就用浸臭汗攻死佢地！」我拉高手袖，準備出招。

「好！我地兩個負責左邊！你就右邊！」大波妹同恤衫男一齊高舉雙手，行到左邊窗邊，散發陣陣汗臭味。

而我就行到右邊窗口位散播臭氣。

「掂呀喂！啲喪屍真係俾啲味臭親！」大波妹一隊個胳肋底埋去，啲喪屍就即刻縮。





之後佢雙管齊下，大啖大啖咁呼氣，用埋把口嗰浸口臭味攻走啲喪屍。

左邊車窗嗰邊啲喪屍的確開始散去，不過我呢邊啲喪屍仲係唔肯走。

好明顯係我身上陣汗臭味唔夠勁，我再噴埋啲口氣出嚟，但都係無乜作用。