我無啦啦同隻芝娃娃交換咗身體，跟住無啦啦又遇上喪屍大爆發: （24）

兩個大隻佬就坐咗喺靠近水吧前面張檯度。

喺張檯旁邊，堆咗十幾排24罐裝汽水，沓埋一齊幾乎有成個人咁高。

我嘅視線先向上focus去嗰棟汽水嘅最高點，再向下focus去紋身佬個口。

然之後，我從檯面跳返落地下，向住嗰棟汽水跑過去。

「啊有老鼠呀！」恤衫男瞄到我周圍貢，嚇到縮埋一舊，「死老鼠唔好過嚟呀！」





「收聲！唔好嘈冤爸閉！」粉衫大隻佬大喝一聲。

而我好快脆就嚟到嗰棟汽水嘅最底部。

抬頭望上去，對於體型細小嘅我嚟講，棟汽水沓埋就好似山咁高。

無幾耐前，我見識過老鼠爬水管，另外喺印象中亦曾經見過老鼠爬墻，因此我相信老鼠係有一定嘅攀爬能力。

我伸展前爪，跟住雙腳一蹬，向上用力一躍，跳到大約半米咁高，然後出手爪住一排可樂嘅包裝膠紙。





衰在出手嗰下慢咗，第一吓爪唔住，又跌返落地下。

我並無就此放棄，而係屢敗屢試。

試咗三四次唔得，卒之第五次就得咗，我成功搵到著力點，爪住咗塊膠紙。

穩住陣腳之後，我就一步一步咁爬上去，同時一路都留意住嗰兩兄弟嘅對話。

「細佬你咪亂郁啦，你郁嚟郁去，我點幫你掹返支叉出嚟。」





「咁痛呀嘛，阿哥你可唔可以輕手啲？」

「我已經好輕手架啦！陣間我數到三聲就掹支嘢出嚟，你忍一忍啦！」

「吓！三聲太短啦，你數夠十聲等我有啲心理準備。」

「得啦得啦，咁我數到十就掹架啦！十、九…」

「慢啲慢啲！重新數過！」

「OKOK！咁你聽住啦！十……九……八……」

當佢地數到「五」嗰陣，我啱啱好就順利爬到上最頂.