我無啦啦同隻芝娃娃交換咗身體，跟住無啦啦又遇上喪屍大爆發: （23）

之前有提過，間茶餐廳嘅大門口係俾木板釘實曬，所以想走其實一啲都唔容易。

「砰！砰！砰！」

恤衫男同大波妹就地拎起兩張櫈，試圖想撞爛啲木板。

可惜撞咗無幾吓，粉衫大隻佬就喺廚房返出嚟。

一見呢兩條友想逃走，佢就一支箭咁跑過去，伸手用佢強大既臂彎，一手稱起一個人：「你兩個冚家剷想逃走？唔使旨意！」





「阿哥，你顧吓我先啦！好痛呀！」個紋身佬一味嗌痛。

條友牛高馬大，而且肌肉發達，俾叉拮到就牙痛咁聲，呢種反差都幾好笑。

「細佬你忍一忍，等我綁起呢兩條友，就幫你掹返支叉出嚟！」

粉衫大隻佬除咗喺廚房攞咗幾條乾毛巾之外，仲搵咗幾條麻繩。

佢將嗰對男女嘅手腳綁起嚟，等二人無得走。





喺被綁期間，嗰一男一女有試過合力抵抗，無奈對手實在太強壯太大隻。

係咁意一拳毆埋嚟，就已經令佢地趴咗喺度，最後只能束手就擒。

「Irene唔使驚，無論點我都會保護你！」恤衫男雙手雙腳被綁住，連自己都保護唔到，居然仲敢話要保護人。

大波妹搖頭歎氣：「唉！邊有男人好似你咁廢，換轉我係男人，一拳就造瓜佢啦！」

「你兩個收聲！等我幫我細佬止完血，轉過頭就收拾你地！」粉衫大隻佬警告完，就行到佢細佬面前。





「阿哥好痛呀！」紋身佬不停擘大口嗌痛。

遠處嘅我見到條友係咁口擘擘，腦入面忽然靈光一閃，萌生出一個諗法。