我無啦啦同隻芝娃娃交換咗身體，跟住無啦啦又遇上喪屍大爆發: （25）

呢個時候，我居高臨下咁望住兩個大隻佬坐咗喺度。

下一步我要做嘅，就係跳落去紋身佬個口度，跟住俾佢咬一啖。

我要咁樣做嘅理由，其實都唔使多講。

經過幾次身體轉移，我已經好肯定只要自己一被咬，咁就會同人或者同動物，甚至同喪屍交換身體。

「三……」粉衫大隻佬揸住支叉嘅柄，再數多兩聲，佢就會郁手。





支叉一掹出嚟嗰下，條紋身佬一定嗌到喊驚咁款。

我捕喺最邊邊嘅位，等待時機就即刻跳落去。


「二……」

紋身佬擰轉面，瞇埋眼唔敢睇。咁啱佢塊面擰到靠近我嘅方向。

我睇清楚個距離，預計曬好啲位，並保持住高度嘅集中力。





畢竟稍有差池，我就會直插落地，到時唔死都一身潺。

「一！！！」

數到最後一聲，粉衫大隻佬用力一抽，將成支叉掹咗出嚟。

為左唔俾啲血標出嚟，佢第一時間攞毛巾㩒住傷口。

至於個紋身佬就同預期中嘅一樣，擘大個死人口大嗌：「啊！！！！！！」





我把握機會，瞄準目標飛身一跳。

呢一刻，我就好似嗰啲跳水運動員，喺半空中劃出一條拋物線，再垂直向下衝。

「啊！！！！！！」紋身佬嗌到半路，見到我急墜緊落嚟。

我同佢對望咗半秒，跟住我呢隻老鼠完美落地無水花，直插入佢個口。

條友見到我飛墜落嚟，第一時間嘅反應係合埋口，可惜佢合遲咗。

我半個身入到佢個口嗰度，佢先合個埋口，結果變相就咬咗我一啖。

佢啲牙咬落嚟嗰吓，我覺得好痛，痛完我就感覺到暈坨坨，並打咗一個冷震。





從呢一連串嘅反應我就知我嘅計劃得咗！

第四次身體交換成功！

當我回復返意識嘅時候，果然不出所料，個口含住一隻老鼠仔，佢條尾仲喺度fing吓fing吓！