我無啦啦同隻芝娃娃交換咗身體，跟住無啦啦又遇上喪屍大爆發: （15）

以為今鋪卒之有嘢落肚，點知隻老鼠反應好鬼快，「her her聲」沿住一條公屋外牆嘅水管爬咗上去。

我仆落地下，乜叉都撲唔到。

「『亞狗』你左邊我右邊！」

「汪！汪汪！」

呢個時候，突然間喺附近聽到一啲聲，並且傳嚟一股人類嘅氣味。





我爬返起身，前行多五十米，離遠睄到漁灣邨前一塊空地上，有兩個男人正俾六、七隻喪屍包圍。

呢兩個人入面，有一個係四眼仔。佢揸住把電鋸，啲喪屍一埋佢身，佢就出手鋸斷對方啲手手腳腳。

至於另一個人，佢雙手笠住鋒利嘅鋼爪手套，向住啲喪屍瘋狂爪擊，「weh」到啲敵人四肢爆血。

咦咪住！我唔係眼花呀嘛？

呢個戴住鋼爪手套嘅男人…咪…咪就係我「自己」？！





講緊嘅當然唔係呢個變成喪屍嘅自己，而係俾隻芝娃娃上咗身嘅嗰一個「自己」。

為咗再睇得清楚一啲，我行去空地上前啲去望。

豬膽鼻、高低眼、睄牙又歪嘴，原來真係無睇錯，呢個生得咁樣衰嘅男人，就係我「自己」！

自從做咗喪屍之後，我淨係諗住食人，就連要搵返自己嘅身體咁大件事，都幾乎唔記得咗。

好彩咁都俾我遇得返佢，仲要副偈無穿無爛、又無變喪屍，今鋪都算還得神落。





「呢度仲有一隻！」

喺我心情喜出望外之際，嗰個揸住電鋸嘅四眼仔，一嘢衝埋嚟鋸我右手。

把電鋸發出滋滋聲，佢一路鋸，我啲血就一路標。

「Ahhhhh！」除咗大嗌之外，我一時間都唔識點反應。

唔使五秒，我成隻手臂就俾鋸斷咗，啲血好似噴泉咁喺傷口中狂噴出嚟。

周圍嘅喪屍已經被收拾咗，四眼仔乘勝追擊，專心對付我一個。