我無啦啦同隻芝娃娃交換咗身體，跟住無啦啦又遇上喪屍大爆發: （14）

接近一百隻喪屍合力正面截停架車，另外又有七、八十隻喪屍，一直由小西灣吊住車尾。

加加埋埋，差唔多有成二百隻喪屍包圍住一架私家車。

咁多喪屍堆埋一齊，莫講話車頭燈，直頭連成架車都被淹沒咗，數量多到根本插針都插唔入。

我只係跑慢咗半步，就已經就逼到出好外面。

正所謂「執輸行頭慘過敗家」，我之後就好似嗰啲搶超市特價貨嘅師奶咁，死逼爛逼都要逼上最強爭返份。





結果未湧到上前面，一大班喪屍就陸續散去。

至於架私家車入面亦已空空如也，乜人都無，就得返一啲血跡。

估唔到最後我連手指尾都分唔到一隻。

截至目前為止，我仲未食到一啖人肉，身體對人肉嘅渴望度越嚟越高，導致我越嚟越頻繁咁發出「Raughhh」嘅叫聲。

太陽緩緩升起，天色已光，成晚都無嘢落過肚，正常人咁耐唔食嘢都會肚餓，喪屍都一樣。





本身我仲保留住一絲理性，覺得食人肉唔好，不過到咗呢一刻，生理上嘅饑渴掩蓋咗一切。

我依家乜都唔想，淨係想食人！

呢附近似乎太多喪屍爭食，我諗我都係行去第度，去啲喪屍無咁密集嘅地方好啲。

我擰轉身，沿住行人路向另一個方向走。

「Raughhh—Raughhh—」





身心極度渴求血肉嘅我，一邊行一邊發出低沉嘅咆哮。

無人俾我食，其實貓狗我都唔拘，甚至老鼠都可以照啃，只要啲肉同血夠新鮮就得！

「吱吱吱…」

呢頭個心諗完，嗰頭就真係有隻老鼠喺面前經過。

我乜都唔理，向前飛身一撲。