我無啦啦同隻芝娃娃交換咗身體，跟住無啦啦又遇上喪屍大爆發: （16）

隨即，佢雙手舉高電鋸，想對住我個頭鋸落去。

我即刻拎剩低嗰隻手去擋，但心入面知道，咁樣其實根本擋唔住把電鋸。

把嘢一鋸落嚟，必定先鋸斷我隻手，再鋸落我個頭。

我心諗今次死得啦！

殊不知喺千鈞一髮間，上咗我身嘅芝娃娃衝咗埋嚟，用佢手套上一對鋼爪，為我擋住咗呢一吓致命攻擊。





「鏘！」電鋸同鋼爪激撞出耀眼嘅火花。

「『亞狗』你做咩呀？」個四眼仔縮開咗把電鋸。

佢叫上咗我身嘅芝娃娃做「亞狗」。

「汪汪！汪汪汪！」

隻芝娃娃上咗我身，學識兩隻腳行路，不過仍然唔識講人話，只係識得吠叫。





佢打開雙手，擋喺我嘅身前，呢一個舉動似乎係想保護我。

哦！我知啦！我家陣唔單止係喪屍，亦都係嗰個師奶，亦即係隻芝娃娃嘅主人。

隻狗認得出我，所以就挺身而出保護我。

「狗係人類最忠心嘅朋友」，呢句說話果然講得無錯！

「唔通呢個女人係你阿媽，你唔想傷害佢？」個四眼仔問「亞狗」。





「汪汪汪汪！汪汪！」

個四眼仔好似聽得明狗吠聲咁，同「亞狗」一問一答：「無論佢係你邊個都好，依家嘅佢都已經變成喪屍，如果你唔對付佢，咁佢就會傷害你！」

聽完對方咁講，「亞狗」依然堅持唔走。

呢刻我同我自己嘅身體，相隔唔夠半隻手臂嘅距離。

喺身上散發嗰一浸人肉嘅香味，不停捐入鼻哥窿，係咁引誘我咬落去。

究竟自己啲肉係咩味嘅呢？好想試一吓！