我無啦啦同隻芝娃娃交換咗身體，跟住無啦啦又遇上喪屍大爆發: （13）

雖然唔知箇中原理，但做喪屍有兩個樣好。

第一唔怕痛，第二就係跑幾耐都唔覺得攰。

「柴灣關公」一開頭追得好貼，不過好快就越跑越慢。

話曬佢揸住把咁重嘅關刀跑，體力消耗一定好大。

再跑多兩個街口，我就成功擺脫咗佢。





至於佢頭先嗰一刀，𠝹到我個肚傷口好深，睇怕要去醫院縫針先至連得埋。

東區醫院離呢度唔遠，只係唔知會唔會接收喪屍做病人。

同埋亦都唔知，醫院嗰度有無俾喪屍侵佔。有嘅話，咁啲醫生、護士好可能都已變成喪屍，又或者俾喪屍吞咗落肚。

為咗防止啲腸再跌出嚟，我用力將佢地塞到最入，跟住放眼望去，面前四周圍都係喪屍。

巴士站、街市門口、十字路口以及其他地方都有。





我地喪屍身上全部散發住同一浸除，係一種喪屍獨有嘅怪味。

相反人類身上就傳出一種又香又甜嘅氣味。

因此我地好容易分辨到人類同喪屍。當一有人經過附近，亦都即刻聞到陣味同察覺到。

「Raughhh！」

身體不斷釋放出嚟想食人嘅訊號，令到我不斷咆哮。





家陣夜媽媽，而且通街都係喪屍，嗰啲倖存未死嘅人，照計都匿埋曬喺安全嘅地方，唔敢周圍亂走。

斷估「柴灣關公」都匿埋咗暫時休息。

當條街一個人都無，無人出嚟俾喪屍咬、俾喪屍追，咁喪屍有咩好做？

答案就係：無嘢好做。

作為喪屍，基本上只得返一種本能反應，就係食人。

即係我地唔會想打機、唔會想睇戲、唔會想打飛機，連講句嘢都唔太想，一心淨係想食人、食人、同埋食人。

就算食唔到人，退而求其次都想食貓、食狗、食兔仔，反正有血有肉嘅都想食！

所以大家會見到啲喪屍，一係就周圍貢，尋找獵物，一係就漫無目的咁，喺條街度行嚟行去，等待獵物出現。





唔怪得之荷里活嗰啲喪屍片，主角多數都係打喪屍，好少會扮喪屍。

原因原來係做喪屍係咁無聊。

我同身邊其他喪屍，喺中巴車廠舊址附近嘅油站同巴士站，無所事事咁徘徊。

兩年前中巴車廠開始清拆，依家經過再都見唔到，嗰座外墻斑駁、外觀猶如廢墟一樣嘅舊建築。

我地一班喪屍，來來回回都唔知徘徊咗幾耐，差唔多就嚟天光，終於等到有人出現。

一架白色私家車從小西灣逃駛出嚟柴灣，無論人數係多係少，反正車上面肯定有人！

方圓十里嘅喪屍包括我，一聽見車聲同聞到嗰浸人類嘅香味，立即就蜂擁上前。





「Raughhh！！！」