我無啦啦同隻芝娃娃交換咗身體，跟住無啦啦又遇上喪屍大爆發: （6）

越追越近嘅我，眼見仲有幾步就追上，偏偏喺呢個時候，天橋上有個金毛仔為咗擺脫捉住佢嘅喪屍，不斷揮拳踢腳。

我已經特登避遠少少，不過條友生得高對腳長，兼且眼界差。

佢一腳踢唔中喪屍，反而踢中咗我。

我當堂被踢「狗」到飛起，撞「狗」咗落旁邊嘅護欄度。

假如再踢高少少，我應該直接飛咗落街。





我忍住痛拿拿臨企返起身，然後向前一望，發現嗰隻上咗我身嘅芝娃娃，已經跑遠咗，唔知去咗邊。

我頂！一路追得咁貼，竟然咁樣跟甩咗！

行人天橋上有兩條分叉路，左邊往青年廣場，右邊就通去與地鐵站相連嘅屋邨商場。

究竟隻芝娃娃行咗邊一邊？係左定係右？

「唔好埋嚟，走開呀！」
「救命！唔好咬我！」




「啊！我隻手啊！」

喺我猶豫嘅同時，天橋上嘅人慌忙咁四處躲避喪屍，情況十分混亂。

最後我相信直覺，揀右邊入商場！

不斷有人從商場逃跑出嚟，我就調返轉跑入去。

果然商場入面同樣佈滿喪屍，佢地識跑識跳，係咁追住啲人嚟咬。





除咗逃跑之外，亦都有人選擇反抗。

一眾反抗人士奮起同喪屍激烈搏鬥，唔少商鋪因此而遭受破壞。

各種貨品散落一地，地下亦有一灘灘鮮血。

喺咁混亂嘅環境下，我喺商場兜咗個圈，尋找自己本來嘅身體。

「好肚餓…有…有狗…」

忽然間，有一隻滿口鮮血嘅喪屍，瞓身飛撲埋嚟我度。

雖然狗嘅視力唔太好，不過卻有良好嘅聽覺及嗅覺。

我聽見隻喪屍嘅腳步聲，同埋聞到一股濃烈嘅血腥味，即時意識到有危險，並及時避開。





隻喪屍捉唔到我，自己撼咗落墻角。

啱先無聽錯嘅話，隻嘢講咗兩句人話。

照咁睇嚟，啲喪屍唔只識叫，仲識得講嘢。

另外都證實咗，無論人又好狗又好，都有可能成為喪屍嘅目標。

趁隻嘢未起返身，我拿拿聲閃開。

呢個時候嘅我，一方面擔心變咗狗嘅自己，另一方面又要擔心俾狗上身嘅「自己」。

然而喺商場中卻搵唔到佢嘅蹤影，莫非入咗地鐵站？