我無啦啦同隻芝娃娃交換咗身體，跟住無啦啦又遇上喪屍大爆發: （7）

成個商場前後得兩個出入口，一個駁天橋一個駁地鐵站。

只要一路直行，穿過玻璃門就係地鐵站。

正當我想行入地鐵站之際，咁啱撞正有一大班喪屍，想從地鐵站湧入嚟商場。

目測數量超過五十隻，每一隻都擘大個口想食人咁款。

面對咁多來勢洶洶嘅喪屍，商場內都無人敢繼續反抗，個個立即調頭走。





「嘭唥」一聲，好快班喪屍撞爆玻璃門，成群結隊衝入嚟。

正所謂「走得摩無鼻哥」，我用最快嘅速度狗衝逃走。

一路跑嘅時候，我心入面居然有少少慶幸自己變咗芝娃娃。

原因係芝娃娃嘅身體細小，因此容許我一時捐人褲浪，一時繞人腳邊，可以好靈活咁穿梭喺喪屍同人群之中。

呢啲唔知算唔算係所謂嘅「錯有錯著」？





離開天橋後，我跑咗幾條街，想搵個地方匿埋。

問題在於，喪屍已經遍佈柴灣每個角落，無論我跑去邊，都梗有幾隻喺咗近。

我跑到索曬氣，就快跑唔郁，於是再次發揮身形優勢，捐入路邊一架私家車車底暫避。

我估啲喪屍應該無咁醒，識搵到嚟車底。

依家嘅時間接近黃昏，天色慢慢變黑，嗰隻上咗我身嘅芝娃娃就不知所蹤。





柴灣雖然地方唔算大，但要搵個人出嚟都唔容易。

尤其喪屍橫行，舉步維艱，搵起上嚟一定更加困難。

「唔好咬我啊！」
「Raughhh!」
「救命啊！救命啊！」
「人肉…好味…」

匿喺車底，齋聽啲聲都知周圍嘅情況幾慘烈。

原本我打算等到附近啲喪屍散開，先至捐返出車底，點不知突然有個阿叔捐咗入嚟。

佢同我一樣，都係想匿入車底避難。





弊在車底空間有限，條友想霸曬啲位，不停出拳又出腳，想趕我出去：「死衰狗咪阻頭阻勢，快啲死出去！」

我當然唔會輕易就範，條友一伸個拳頭過嚟，我就反咬返佢隻手。