我無啦啦同隻芝娃娃交換咗身體，跟住無啦啦又遇上喪屍大爆發: （5）

實情我地公司係做物流生意，隔籬公司就賣潛水用品。

咁即係代表，兩間公司基本上無任何合作同交集，可以話「大欖都扯唔埋」。

最多就係平時行出行入，又或者等𨋢嗰陣會遇到隔籬公司啲人。

結果，我女神同條鬼佬就係每日等𨋢嘅時候，大家搲水吹而認識。

吹吓吹吓，就由𨋢口吹到上床。





我溝咗一年都溝唔到嘅女神，條鬼佬用咗短短一個禮拜就搞掂咗。

深深不忿之下，我過咗泰國，使咗唔少錢，搵個巫師幫手「移形換影」，轉換身體。

或者只有變成「洋腸」，先至有機會進入到女神個窿。

當其時個巫師傳授咗我一個方法，連帶幾句口訣，佢同我講，只要跟住佢教嘅步驟去做就得。

返到香港後，我就按佢嘅方法照做，成個過程每一個步驟我都做足曬，但結果卻唔成功。





我並無輕易放棄，且第一時間透過視像通話向巫師求救。

好死唔死，條友唔知係部電話廢定係屋企wifi垃圾，講一句就窒十秒。

我淨係聽到佢話我搞錯咗啲嘢，至於實質搞錯咗啲嘢就完全聽唔清。

後尾佢有補send一段文字教我，但全部都係泰文，我用google翻譯成嘅中文，無一句睇得明。

最後我實在無辦法，又無錢過多轉泰國，重複試多幾次都唔得，唯有就被迫放棄。





本來以為個巫師無料到，點知世事難料，今日無啦啦居然俾我身體交換成功。

弊就弊在唔係同「美國隊長」交換，而係同隻寵物狗。

我實在接受唔到自己變成一隻又細粒又樣衰嘅芝娃娃！

雖則未知有咩方法可以將身體交換返嚟，不過依家唔理得咁多，最緊要係唔好俾自己嘅肉身走甩。

萬一佢走甩咗，又或者俾喪屍咬瓜咗，咁我呢世可能都唔使旨意做返自己。

好在上咗我身嘅芝娃娃，行動尚算敏捷，沿途都避過幾隻喪屍。

之後佢轉個彎，沿斜路跑上行人天橋。

而我都熟習咗用四隻腳跑步，可以加快速度追趕。