我無啦啦同隻芝娃娃交換咗身體，跟住無啦啦又遇上喪屍大爆發: （4）

我停低擰轉面，見到個師奶俾兩個中學生撲跌咗。

「Raughhh—」嗰兩個中學生面目猙獰，聲音低沉咁咆哮。

「救命呀！有無人救我呀！」個師奶一邊求救，一邊掙扎。

奈何家陣一街都係喪屍，人人自危，就連啲差佬都自身難保，根本無人會救佢。

而家陣嘅我只係一隻體型細小嘅芝娃娃，就算想救都無能為力。





嗰兩個中學生左右一人一邊捉住師奶對手，然後mak大個口，一啖噬落去。

咬落去嗰吓，二人嘅表情好似食緊漢堡包咁滋味，但事實佢地係食緊人肉。

「好痛啊！」個師奶痛苦大叫，手臂上啲肉一忽一忽咁被咬開，啲血巴巴聲咁流。

幾秒後，佢就痛得滯直接暈咗。

喺暈低之前，佢依然關心自己隻寵物：「BB返嚟…唔好亂走…」





然而佢呢句說話未講完，我就轉身走咗。

一嚟我唔係佢「BB」，二嚟場面有啲血腥，我唔係好頂得順。

至於佢口中嘅愛犬，依家上咗我身，正喺度通街走。

我追足幾條街，都係仲未追得上。

眼見成個柴灣無論係戲院、球場定係公園，都出現咬人嘅「喪屍」。





隻芝娃娃再咁周圍走，遲早會瀨嘢。

同埋我真係諗唔明，點解我會無啦啦同隻芝娃娃交換咗身體？

唔通……

唔通…嗰個泰國巫師唔係神棍…條友真係識幫人body swap（身體交換）？

但…但…問題係…我之所以想交換身體…原因係做型棍鬼佬，而唔係變做芝娃娃喎！？

故事一開頭，我提過自己上個禮拜去咗一轉泰國。

其實我唔係去玩，而係去搵一個識得身體交換法術嘅巫師。

事因我追咗好耐嘅女神俾個鬼佬溝走咗，我個心好唔忿氣、好唔甘心！





為咗奪取女神嘅身體同感情，我腦海中出現一個好大膽嘅想法:

我要同嗰個鬼佬交換身體！

講真，喺香港做鬼佬真係好著數，唔理個樣生成點，反正點都會吸引到一部分崇洋港女獻身。

就算係大肚腩禿頭阿叔都好，只要係鬼佬都唔愁無女屌。

講返小弟我追咗公司一個女同事足足一年，而我都知自己其貌不揚，因此額外做咗好多嘢去討好對方。

例如大時大節送吓禮物，平時又會請吓對方食飯，工作上佢有咩事我都一定主動幫手。

總之做到嘅我都做曬，求嘅就係想得到女神芳心。





只不過，現實就係當你付出咗，卻唔一定得到回報。

我做到咁出面，但女神一直都對我無表示。

直到一個月前，隔籬間公司嚟咗個鬼佬，又靚仔又大隻，成個「美國隊長」咁款。

就係呢條友溝走咗我女神！