我無啦啦同隻芝娃娃交換咗身體，跟住無啦啦又遇上喪屍大爆發: （3）

「啊！！！」突然間公園內有人大叫。

我心諗，我變咗隻狗咁大件事都未嗌，邊個因咩事嗌到鬼殺咁嘈？

全公園嘅人都擰轉面，順住啲聲望過去…

原來有個西裝友唔知喺邊度衝出嚟，佢捉住一個散緊步嘅阿伯，生勾勾一啖咬落人地條頸度。

「啊！！！」 個阿伯條頸噴曬血，好痛苦咁慘叫。





見到咁樣嘅場面，公園內幾乎所有人都嚇到呆咗，其中有幾個女人仲尖叫埋一份。

更大獲嘅係，咬人嘅癲佬並唔止一個，其後陸續出現第二第三第四第五…

「砰！砰砰砰！」

呢頭公園入面人咬人，嗰頭出面又傳出槍聲。

短短十分鐘之內，突發嘅事一單接一單，呢幾吓槍聲仲要嚇親上咗我身嘅芝娃娃。





佢驚失失咁吠咗兩聲，再黎手丟走我盒figure，跟住轉身逃跑。

「喂你咪走！個身體係我架！快啲還返俾我！」我嘗試嗌停佢，不過隻嘢唔聽人話，越叫就越走。

既然如此，我唯有用盡全力，擺脫個師奶嘅緊抱，之後跳落地下上前追。

雖然隻芝娃娃上咗我身變咗個人，但依然好似狗咁用四肢跑步，而且速度仲唔慢。

相反我就唔太習慣用四隻腳移動，一開頭跑得比較慢同吃力。





出到公園門口，跑咗大約一百米就經過柴灣體育館。

路邊停咗兩架警車，喺體育館門前，有七、八個差佬正企圖制服，兩個著住NBA波衫嘅男人。

班差佬人多勢眾兼有槍有棍，點知連兩條友都搞唔掂，仲要被反咬一啖。

嗰兩個男人一個著高比24號，一個著占士23號，佢地勁撚狼胎，一個咬斷差佬啲手指，一個就咬甩人耳仔。

班差佬完全無佢地符。

好彩隻芝娃娃都醒目，意識到前面有危險，於是轉方向跑過去對面馬路。

我一直吊住佢尾，跟埋佢過馬路，至於嗰個師奶就一路追住我：「BB唔好亂跑呀，好危險架！」

的而且確，今日條街真係好危險，轉個彎又見到有癡線佬喺度咬人。





啲人都唔知係咪吃錯藥，一個二個好似喪屍咁，瘋狂追住啲人嚟咬。

而睇過喪屍片嘅都知，喪屍係會連動物都照咬，所以我都要打醒十二分精神，隨時警惕。

「哎呀！救命啊！」

跑到半路，突然背後有人仆低兼嗌救命。