我嘅職業係專溝人地個女朋友: 12.61

「傾完喇?」過咗唔知幾耐嘅時間，李立仁見郭子安終於行返出嚟就問佢。
 
「嗯...」郭子安仍帶著傷感應道。
 
「嗰十首歌係同你有關?」李立仁問。
 
「係... Uncle Lee，我終於明白你當年嘅說話...」
 
「咩說話?」李立仁不明白。
 




「當年你曾經勸過我有啲嘢後悔已經太遲，我依家真係好後悔...」郭子安不堪回首。
 
「人總係要從錯誤中學習，只係有時就算學識咗都已經無得再補救... 錯可以改，但錯過呢? 可能就係一世...」李立仁同樣搖頭嘆息。
 
「如果我當年有聽你講，對自己有信心接受柔柔咁佢就唔會同啟光一齊，之後佢地亦唔會遇上意外...」郭子安內疚地道。
 
「原來你係後悔哩樣嘢? 咁子安你又諗得太極端喇，你點知同你一齊後佢就唔會遇上其他嘢? 話唔定同你一齊佢會更早就遇上意外? 有邊個知? 所以無得咁諗如果㗎...
 
 不過我好明白你依家嘅心情，因為當一啲唔好或者令自己後悔嘅事發生後，人就總喜歡將所有責任攬晒上身覺得係自己問題明明應該有能力可以避免件事發生...或者因為內疚感會分擔到我地部份嘅悲傷? 定人嘅天性總喜歡要搵原因去解釋一件事嘅發生? 當年 Uncle都曾經都遇過類似情況自責咗好耐...
 




只但係我覺得你唔應該因為哩個原因而怪責自己同後悔，相反，你應該後悔嘅係因為你當日自己嘅決定，令你地錯失咗一齊了解大家心意嘅機會，亦因為令你錯失咗彼此喺埋一齊嘅機會...
 
啟光當年比你強嘅，係佢有一顆自信比任何人可以更可以令思柔得到幸福嘅心，所以佢可以毫不畏懼心安理得全力以赴咁追求思柔。相反你就畏首畏尾對自己完全無信心... 其實你還你，郭非凡還郭非凡，佢唔得唔代表你唔得，點解一定要將兩者掛勾?
 
當然你嘅出發點其實係好嘅，Uncle站喺個女幸福嘅立場亦唔係話你選擇錯，只係...大家選擇唔同，而人本身就係要為自己人生每一個決定而負責，所以先會有後悔兩個字嘅出現，因為我地唔會為未發生嘅事而後悔。」李立仁語重心長地講。
 
「我知我係一個不折不扣嘅傻瓜...」郭子安仍然懊悔地說。
 
「我好明白你嘅心情... 曾經我都好後悔好憎自己嘅遲鈍，不過我比你好彩嘅係我後悔得早，所以之後有思柔媽咪嘅出現，但唔好彩嘅都係我後悔得早，所以要受哩種痛嘅日子真係好長...其實當年我同思柔講，或者你失憶其實對你地三個都算係最好嘅結局，不過佢最後都係選擇咗留下一線希望你有日會記得返佢...」李立仁帶著唏噓地說。