我嘅職業係專溝人地個女朋友: 12.62

「其實我諗返，由我決定推思柔比啟光嗰刻開始，如果思柔同啟光唔係咁早過咗身，依家哩個都算係最好嘅結局... 佢地得到幸福，而我亦可以開開心心又有人生目標咁過咗20年，但有得揀我都唔想哩世就咁永遠忘記咗柔柔，所以係年老嗰陣先記得返佢其實都幾好，起碼受苦嘅時間唔駛太長... 只但係依家咁我受嘅痛就更加大...」
 
「我地其實都唔應該太執著喺生命嘅長短而係生命嘅質素...Uncle已經8字頭，見証過太多離離合合生老病死... 說穿了，人生其實本身就係一個不斷得到再不斷失去嘅過程。由我地出世開始，我地會不斷得到好多嘢，例如親情，友情，成長，知識等等，依段時間我地得到嘅嘢會遠遠比失去多，但當到到過咗某個年紀，我地就會調返轉到咗開始不斷失去而鮮有得到嘅階段，例如身邊越嚟越多嘅人會開始離開，身體機能同精神會不停衰退，人亦變得越嚟越健忘開始失去記憶...
 
所以我有時諗，或者早啲離開依個世界其實都未嘗唔係一件好事... 你睇下我，依家思柔唔係度，思柔媽咪又唔係度，連你爸爸同Uncle Cheung佢地都已經唔喺度，得返我自己一個仲要靠輪椅先行動到，咁你話我一個廢人留喺哩個世界仲有咩意義? 或者隨住你今日嚟搵我，可能我連淨低最後一件使命都已經完埋了.. 」
 
「Uncle Lee你唔好咁講啦...」聽到李立仁嘅說話感受到佢嘅傷感郭子安唔知點回應好。
 
「咁你又放心，我唔會自尋短見，只係想話比你聽人長唔長命唔係最重要，有咩人喺身邊，活得開唔開心精唔精彩先係最重要。思柔雖然算係離開得早，但至少佢同啟光走之前真係過得好開心同幸福，咁其實已經好好㗎喇... 某程度上換過角度諗，佢地可以一齊離開，可能都係一種福氣... 唔係好似我咁一個老頭子自己活喺世上就算長命百歲咁又有咩意思? 咪只係得返寂寞?
 




不過既然上天比咁長命我，我都要努力搵返自己嘅人生意義先得，所以自從你Auntie走咗後我就出返山間中幫啲情侶解決下疑難，咁先對得住個天同一直陪住我嘅人，因為佢地一定都會希望我可以代替佢地好好咁繼續生活落去...
 
所以子安你都係呀，你仲只係50歲，行得走得，雖然我明思柔嘅死對你嘅打擊好大，但你都要好好諗下嚟緊自己嘅人生仲有咩目標，為咩而繼續活下去... 我相信思柔都好希望你可以繼續幸福快樂咁生活落去，只要你做得到，你會發現其實思柔就好似仍然存在一樣...」
 
「我明白喇Uncle Lee.... 多謝你提醒咗我，我應承過柔柔就算有日我地無咗大家，我地都會幸福快樂咁生活落去... 而且喺記得返佢後我好肯定，記得李思柔同李思柔相遇過嘅郭子安，一定比無同李思柔相遇過嘅郭子安幸福!」