我嘅職業係專溝人地個女朋友: 12.60

如果我們不曾相遇... 當時問你嗰個問題，其實係因為我當年已經暗暗下定決心唔會接受你同你一齊，而咁亦代表終有一日我地會各自有另一半，好可能唔再可以喺大家身邊。我不其然諗，如果我地嘅生命無交匯過無相遇過咁會點呢? 我相信會完全係另一個故事...
 
無你嘅世界一定變得好枯燥乏味，而我亦無可能咁有毅力去追求自己嘅夢想.。 只但係我真係無諗過當日隨口一問，結果真係應驗咗，我地一方有其中一個因為意外先行離開咗哩個世界... 如果當日我無咁烏鴉口，你今日會唔會就唔會離開咗?
 
仲有呀，原來你個衰妹一直都知道我係知道你鍾意我... 你寫哩兩首歌，代表你當時唱<兄妹>同<最佳位置>對我表白嗰陣係仲有記憶未醉得晒啦?不過之後你就一直扮唔知扮無事，等我可以繼續虛偽落去...
 
可惜你聽唔到我等你瞓咗後細細聲喺你耳邊同你講嘅嗰句說話所以一直都估錯晒，我嘅虛偽並唔係明明唔鍾意你但就因為想有人陪而扮鍾意你留住你，事實係正好完全相反...
 
雖然依家已經太遲，但有一句說話我係一直欠你，一直都好想同你講... 啟光對唔住喇，雖然你可能唔啱聽，但今日我點都要親口同你老婆講一次㗎喇... 柔柔，其實我一直都好鍾意你，我心入面一直最鍾意最著緊嗰個都係你，只係正正因為咁，所以我唔敢接受你同你一齊，因為我好驚自己有日會親手摧毀咗我地哩段關係令你傷心，我唔想成為嗰個再令你喊嘅凶手呀... 但依家我先知，原來我係全世界最白痴嘅人...
 




記唔記記我地睇<你的婚禮>嗰陣，我仲話點解男主角會後悔，但哩家，我開始明佢嘅心情，原來佢後悔嘅並唔係救咗女主角，而係後悔自己點解之前一直要錯失同對方嘅緣份呀...
 
如果佢可以捉緊之前兩次緣份早啲同女主角可以一齊，咁當日嘅意外就唔會發生，佢地可以一直一齊之餘佢嘅人生亦唔會因為受傷而變得暗淡無光無咗目標最後間接害到佢地要分手...
 
如果我唔係擔心太多一早接受你肯同你一齊，咁你同啟光就唔會有之後嘅事，亦可能唔會一齊遇上之後嘅意外...  我真係好後悔，但我依家又仲可以做啲咩去挽救?
 
啟光，其實我都唔知應該多謝你定怪責你好...曾經，因為你嘅出現，令我覺得我當年嘅選擇並無錯，你可以完美咁取代我比到幸福柔柔，亦令我覺得或者哩個真係上天最好嘅安排，但依家... 你地咁快就離開咗哩個世界離開咗我，又令我懷疑我當日嘅決定到底係咪錯... 點解上天要有哩個安排，淨係留低我得返我一個人自己喺度傷心?
 
我真係好後悔呀...」
 




郭子安喺墳前講到泣不成聲...