我嘅職業係專溝人地個女朋友: 12.59

「柔柔，估唔到我地咁多年無見，再見面嘅地方同方式竟然係咁...
 
當日你送本書比我嗰陣，係咪都expect有日我會因為佢而記得返晒你嘅嘢? 我終於明白點解你寫咗句”一切是最好的安排” 喺你個簽名上面，因為無論我睇完本書記得返我地嘅嘢又好，仍然係唔記得都好，你都相信哩個係上天比我地最好嘅安排，就好似當年我同你講嘅一樣。
 
事實上因為我嘅失憶，之後你同啟光可以好幸福咁結婚生活，而我亦可以無傷無痛咁生活咗差唔多二十年，咁好似大家都幾好呀... 但我估你當日應該無諗過，雖然個故事無令我諗返起你，但卻令我記返起我地之間嘅約定，而最後因為哩個約定，令我20年後終於都係記返起晒我地之間以前嘅所有嘢。
 
哩個時間記得返你算係早定遲? 定還是係啱啱好? 我唔知道... 我淨係知道你真係好自私呀，自私並唔係因為你想我記返起你，而係因為你令我記返起你後又唔等埋我就自己一個走咗去，咁你叫我依家可以點面對你，點面對自己?
 
你哩個故事，哩十首歌，當我有返記憶我就知你係諗住我地以前嘅嘢嚟寫... 咁到底你係想話我聽其實你一直都仲未放低到我? 定其實你係希望透過寫完哩個故事，將我同我地以前嘅經歷都放低晒等你可以安心同啟光結婚?  我猜測唔到答案...
 




不過隨住你嘅離開，我已經無可能知道答案而答案亦變得唔再重要...因為無論原因係咩，我都唔會再改變到永遠失去你同唔會再可以見到你哩個事實，咁你係放低咗我定放唔低我，其實又有咩分別?
 
 
頭先睇套戲嗰陣，諗返起以前我地一幕又一幕嘅畫面，其實感覺都幾諷刺...
 
童年你與誰渡過，估唔到最後真係應驗咗你嗲哋所講，我地童年係一直都一齊過，大家嘅兒時回憶都充滿住彼此嘅身影，但最後我地偏偏就無一齊到... 咁到底係幸運定不幸? 如果有得揀，依刻我會寧願做首歌嘅男主角，可以有機會唱到依首歌，因為過去已經定咗，但如果我地一齊，就有機會可以有個無限美好嘅未來而唔係依家哩個結局...
 
聽住八三夭嘅兩首勵志歌，諗起我地明明互相鼓勵大家話要忠於自己不被世界改變，要互相扶持去完成大家嘅夢想同約定，但最後我就率先放棄扔低你一個自己默默堅持落去...不過多得你嘅堅持，我亦終於完成咗我地嘅約定，你嘅故事我嘅電影終於都可以搬上大銀幕，只但係你已經唔可以再喺度同我一齊分享哩個重要時刻... 如果我可以多啲執著早啲完成，好可能我就唔駛等你已經離開咗哩個世界我先完成我嗰部份，咁我地依家就可能好開心咁一齊喺戲院欣賞緊哩個屬於你同我嘅故事...