我嘅職業係專溝人地個女朋友: 12.58

「Uncle Lee!」郭子安趕到去李立仁屋企，發覺多年無見對方原來已經係一個80歲需要坐輪椅代步嘅老人家。
 
「子安?」對於郭子安嘅到訪李立仁感到意外。
 
「柔柔佢係咪仲喺英國? 佢依家點呀?我好想見佢好想搵佢呀...」郭子安心急地問。
 
「你... 記得返思柔?」見郭子安嘅行為李立仁立刻推測。
 
「係呀! 我啱啱睇自己套戲嘅首映禮嗰陣，突然記得返晒同佢嘅所有嘢...求下你話比我聽佢依家喺邊呀? 我有咩方法可以搵到佢?」郭子安緊張地問。
 




「佢... 其實依家喺香港，我可以帶你去見佢...」李立仁神色帶點黯然答道。
 
「好!」但郭子安並無察覺。
 
 
之後郭子安就跟李立仁指示揸車上咗一座山上面，而山路上沿途嘅景色令郭子安越嚟越感到不安...
 
「到喇...」終於李立仁開聲。
 
「柔柔佢...死咗?」郭子安咁講係因為落車後佢見到嘅只係一個墳墓，上面寫住”愛女李思柔，愛婿張啟光之墓”。




 
「係... 喺幾年前佢同啟光因為一宗交通意外喺英國過咗身， 之後我就將佢地嘅骨灰帶咗返嚟哩度安葬...」李立仁痛心地說。
 
「點會咁㗎... 點解咁大件事一直無人話我知?」郭子安完全不能接受。
 
「一來你本身已經唔記得咗佢，提唔提都唔再重要﹐二來... 係思柔臨走前叫我地唔好同你講，佢話驚會刺激到你記得返佢，因為依婷講過佢結婚嗰陣你曾經有過啲反應，佢寧願你一直唔記得佢唔重視佢，咁就唔會為佢嘅離開而難過...」李立仁解釋。
 
「咁...嗰陣同我傾版權嗰個人係邊個嚟?」郭子安疑問，仍然心存希望搵到破綻揭穿哩個並唔係事實。
 
「其實一直同你傾嗰個都係我嚟... 當時我地收到出版社電話，話思柔原來一早已經同出版社講好咗，佢嗰個故事邊個都唔會賣比佢地拍電影，除非嗰個係一個叫郭子安嘅人，而佢地都無諗過咁多年後，哩個人真係出現咗話要將思柔嘅故事拍電影，所以就跟思柔嘅意思打比我等我決定同負責，結果我就以中間人嘅身份同你處理啲手續... 當時我都有少少不明思柔所意，但依家睇嚟哩個似乎係你地之間嘅...約定?」李立仁解釋。




 
「個傻妹... 唔怪得當時搵佢唔到結果只可以透過出版社希望可以聯絡到佢，原來當時佢已經...」依個時候，郭子安已經開始喊到泣不成聲，無諗過過咗咁多年咁辛苦終於記返起對方，但已經係天人相隔。
 
「人嘅生命有時真係好脆弱，有好多意外亦真係我地預計唔到，但我地好似永遠都唔會學得識哩個道理...
 
我估你應該有好多嘢想同思柔講，而思柔亦應該好掛住你，你地慢慢喺度獨處下先啦...」見狀完李立仁講完就坐住輪椅自己行開咗。