我嘅職業係專溝人地個女朋友: 12.49

18年後
 
某一間戲院內
 
一條寫住”十首歌一個故事首映禮”嘅橫額下面
 
企住咗一個接近50歲嘅阿叔正接受記者訪問。
 
 
「郭導演，第一次執導嘅電影終於上映，可唔可以分享下你依家嘅心情係點? 」記者A問。




 
「當然喺好激動同好興奮啦，就好似喺產房出面等緊自己個BB出世咁~」阿叔笑住答道。
 
「咁想問下你點解會諗到拍”十首歌一個故事”哩套戲? 當中又有無咩故事可以同我地分享下?」記者B問。
 
「其實好神奇，喺差唔多二十年前因為一次意外，我昏迷咗足足兩年，而當我醒返後除咗屋企人外我就咩記憶都無晒，甚至一度連講嘢我都唔記得點講... 之後我一個當時其實已經唔記得佢喺邊個嘅青梅竹馬見我喺醫院悶就送咗”十首歌一個故事”哩本原著小說比我睇，而哩位突然變得陌生嘅青梅竹馬正正就係小說嘅原著作者李思柔小姐。
 
不過收到哩本書嗰刻我並無立即打開嚟睇，直至一段時間後我意外搵返佢出嚟先真正開始閱讀，結果一路睇我一路都好感動，仲有幾次睇到喊起上嚟添...之後我個腦就一直比咗個訊息我，同我講我一定要以導演身份將哩個故事拍成電影，結果努力多年後終於有今日嘅出現喇~ 」阿叔邊懷緬歷史同自己哩十幾年嘅辛酸邊講。
 
「原來郭導演同原著作者係青梅竹馬? 可能郭導演你唔知，據我地嘅消息所得，因為哩本小說當年大賣，所以其實你並唔係第一個想將哩個故事拍成電影嘅人，但無論當時投資者出幾多錢李小姐一直都拒絕將版權賣比佢地拍電影，但唯獨多年後由你提出佢就答應咗。




 
所以你覺得李小姐肯賣比你拍會唔會係因為你地以前嘅關係? 會唔會哩個故事本身同你都有關?」記者A問。
 
「坦白講我都係第一次聽到哩個消息，所以真係答唔到你... 事實上之前同我接洽嘅都唔係李小姐本人而係佢委託嘅一位中間人，而且仲只係象微式咁收咗我一蚊就賣咗個版權比我拍... 或者...真係因為我地以前嘅關係?
 
但好抱歉因為我失咗憶所以真係解答唔到你哩個問題，可能我之後都要努力去尋找答案又或者有機會再親身去問下李小姐先知~」阿叔有少少愕然咁答。
 
「咁雖然你失咗憶唔記得晒以前嘅嘢，但咁多年嚟你同佢仲有無聯絡? 就你所知你地以前關係係點?」記者C接著問。
 
「因為李小姐嘅父親同我父親係世交，所以我失憶後初期我地好間中都仲有見下面，佢當年個婚禮我都有出席。不過就我所知，喺10年前左右因為佢先生嘅父母身體出現毛病喺英國需要人照顧，所以佢同佢先生就移民咗去嗰邊，之後我地都無再見過面了， 就算之後我想拍哩段電影主動搵佢傾版權問題嗰陣，佢都係經出版社再透過中間人同我聯絡...」阿叔導演略帶可惜咁講。