我嘅職業係專溝人地個女朋友: 12.48

哩次見完郭子安一個多月後，李思柔見郭子安都仍然唔記得自己就終於下定決心同張啟光完成本身兩年前就應該完成嘅婚禮。
 
張啟光知道後當然歡喜若狂，而自此李思柔亦無再點去探望過郭子安，直至結婚當日郭非凡，郭依婷兩夫婦再加埋郭子安嚟咗參觀佢嘅婚禮。
 
望住李思柔著住婚紗講我願意嗰一刻，郭子安有種感覺哩個畫面好似似層相識唔知自己之前喺邊度見過， 但當佢好努力咁想諗返起到底喺邊度見過嗰陣，佢感覺到個心突然有一下劇痛，下意式用手掩住咗自己個胸口。
 
「阿哥你無事嗎?」坐喺郭子安旁邊嘅郭依婷見佢有啲異樣就問。
 
「唔知點解頭先個心突然有陣劇痛，不過依家又好似無事喇... 」痛楚一閃即逝，郭子安舒緩了一下便答。
 




「心痛? 駛唔駛去醫院檢查下?」郭依婷有點擔心是之前傷患的後遺症。
 
「咁又唔駛，應該無事嘅...」見已經無痛郭子安唔想小題大做。
 
「但你面色好似都唔係幾好...」郭依婷仍然擔心道。
 
「我無事呀，不過係唔知點解個人依家有啲down，好似有種莫明其妙嘅失落感咁...」郭子安有點心情低落咁講。
 
「失落感?」郭依婷有點不明所意。
 




「嗯...有種感覺好似自己失去咗一啲好重要嘅野咁...」郭子安諗咗陣後嘗試將自己嘅感受講出嚟。
 
「咁...你有無諗返起啲咩?」郭依婷聽到後望一望台上嘅新娘子再望一望自己阿哥，然後試探性地問。
 
「無呀，會諗起啲咩? 依家個腦又好似有陣倦意懶洋咩唔想諗嘢咁... 不過應該休息陣就無事㗎喇...」郭子安突然又感受到有陣倦意侵襲唔想諗嘢。
 
「咁你留意住，有咩唔舒服就即刻同我講啦。」郭依婷心情有點忐忑不安咁講。
 
幸好休息了一會後郭子安就完全回復正常，再無任何不適嘅感覺。







不過哩晚郭子安瞓瞓下嗰陣，又夢見返頭先李思柔著婚紗嗰個樣，只係旁邊嘅新郎就換成咗係自己，然後佢就突然醒咗。
 
知道剛剛係夢境，加上諗返晏晝嘅怪異感覺，佢突然好好奇想睇返自己同李思柔嘅過去，好想了解李思柔哩個人，於是佢就起咗身主動搵返晒以前自己同李思柔嘅相出嚟逐張逐張咁睇。
 
由幼稚園到小學再到中學大學，佢發覺自己同李思柔真係每個時期都一齊影過好多相，可惜明明每張相都有自己個樣仲笑得好開心，但佢嘅感覺就好似只係望住一個陌生人嘅相咁，所有嘢都完全無印象。
 
花咗整個夜晚直到日出先終於睇晒啲相，但咁並無令郭子安感覺好咗，相反只係令佢對自己同李思柔嘅關係更加覺得好奇。
 
(到底我同佢以前嘅關係係點呢? 點解咁friend嘅青梅竹馬我竟然一啲印象都無? 仲有咩方法可以了解佢多啲呢?) 郭子安瞓返喺自己張床度諗。
 
之後，佢又專登喺手機上網搵咗李思柔寫嘅專欄嚟睇，睇完後佢又突然醒起李思柔之前送比自己嗰本書，於是佢好努力咁喺書櫃搵咗一大輪，最後成功將本書搵返出嚟，然後終於再一次打開哩本書…