我嘅職業係專溝人地個女朋友: 12.50

「咁雖然你今次係第一次拍電影，但之前都喺哩個行業打滾咗唔短嘅日子，可唔可以分享吓你拍哩段電影嘅故事?」記者A又問。
 
「當年我睇完個故事有咗要拍電影哩個念頭後，我就開始從事電影行業嘅工作，之後我聽返我屋企人講先知原來我失憶前已經做PA做咗超過10年，所以有人話原來一個人嘅夢想同興趣係印咗喺DNA入面，就算失咗憶後都唔會改變原來係真有其事。
 
而或者因為以前嘅記憶入咗骨，所以我重新再做PA後雖然好似全部嘢都要重頭學過晒咁濟，但就上手上得好快，努力咗幾年後就得到林導嘅賞識比我嘗試做佢嘅副導。
 
嗰段時間嘅經驗對我嚟講真係好寶貴，不過因為我想將李小姐哩個故事以最完美嘅方式演繹，所以雖然由睇完本小說開始我就已經一直構思個故事應該點拍，但我並無心急咁將佢完成，直至再過多幾年當我覺得自己真係已經預備好，我先開始劇本嘅最後修改同搵投資者正式起動拍哩套電影。
 
再經過幾年嘅努力，今日終於可以睇到佢上映，所以我心情都好激動，我敢講哩套電影真係貫注咗我哩十幾年嚟嘅心血。」阿叔導演邊回憶邊說。
 




「各位記者朋友，首映場好快就開始，或者我地再問下一班演員幾個問題然後再一齊入場欣賞?」依個時候PR人員見時間差不多就對記者講。
 

哩位阿叔導演就係郭子安。正如佢所講，當年佢睇完李思柔本小說後，唔知點解就一直有一個要將故事拍成電影嘅信念盤旋喺佢個腦海中，於是佢重投電影業嘅懷抱，經過一年又一年嘅努力，哩日終於成功將李思柔哩本書嘅故事拍成電影並於戲院上映。
 
雖然拼搏咗咁多年，但郭子安其實一直都唔知自己點解睇完本小說後就有個咁強嘅念頭，只係一直好努力好想將哩個信念完成。但剛剛記者所講嘅資訊加上諗起自己當年都係因為參觀完李思柔個婚禮後先突然對佢同自己嘅過去產生好奇，郭子安亦開始相信哩個念頭應該真係同李思柔有關係，只係佢諗唔到答案。
 
(睇嚟之後我真係有需要再搵下哩位青梅竹馬問下佢喇...) 入場時佢心入面諗。
 
 




經過一輪擾攘入到戲院，郭子安坐咗喺第一排，然後就第一次以觀眾身份喺戲院入面細心咁欣賞自己第一次執導嘅作品。
 
正如書名十首歌一個故事，戲嘅內容都同十首歌有關，就係十首歌串成咗一個故事。只但係郭子安無諗過喺戲院嘅大銀幕親身欣賞自己嘅作品，聽到哩十首歌嘅時候，強烈嘅視覺同聽覺效果卻勾起咗佢一段段久被遺忘嘅回憶。